YOBI.
11.
Ki, kudoki gala availa ibodi bimapu komwaidona bigimakava lokulilivali? Ki, kudoki avai tau biyobidubadu bigatona bibani avaka kala bwaina? 
Yobi mwa, ki, kudoki gala bakamapwaisi m bigatona? Kaina m biga yousokana bivigaki ipakalaki kaiyamaisi gala bigatona? 
Yoku kulivala mwada avaka m biga kamokwita wala; kulivala mwada yoku tomigileu Yaubada omatala. 
Eisekila gala wala anikoli ammakawala Yaubada bimapu m biga! 
Matauna bilukwaim kabitam nanamsela bidubadu. Mimilisi nanamsa saina nigonigwa gala ibodi tomota bikatetasi. Yaubada eimipukwaim sitana wala, gala makawala ibudoki m sula. 
Ki kudoki ibodaim bukuvitobu ammakawala Yaubada la tovakaigaga deli la peula, kaina gagabila bukubani Yaubada tomwaidona? 
Yaubada la tovakaigaga makawala labuma gala isim kala kalitutila, e gala wala ibodi bukuyosi. Yaubada inikoli si valu tomata, mitaga yoku gala kunikoli. 
Yaubada la tovakaigaga kala beiyaya ikalisau valu watanawa, deli goli ikalisau bolita kala beiyaya. 
Kidamwa Yaubada bikatupipaim e bilauwaim oyakala, availa okaboyakala ibodi bisilibodi matauna? 
Yaubada bogwa einikoli availa availa matausina gala isim dimlesi; matauna bogwa leivitoki tolosila komwaidona mitugaga leiuvagaisi. 
Tomota toninagowa ibodi bitaboda ninasi wa yam makwaina ase nabubolodila biunaisi litusia makawala wala bulutuvalu. 
Mwa, Yobi, ibodi bukuninavila, e bukukukoli Yaubada. 
Kukwau kuligaiwa komwaidona mitugaga deli sula metoya om valu. 
Oluvi bukukowana tuvaila, deli m tuvaluwa bukutotu peula. 
E oluvi komwaidona kam mwau onanom biwokuva, makawala dadoya bitayelu wala bima e bimyeiya. 
Yoku m momova visigala bikalisau kalasia visigala tutala bitowota, e momova dudubalela makawala biwolali visiga. 
Yoku bukukwala e bisim m pikwaku; Yaubada bikolaim e bukubani m vaiwasi. 
Yoku gala bukukukoli kam tilaula; e bidubadu tomota bikanasi wala binigadaimsi paila pilasi. 
Mitaga tomitugaga bimitigibugibusi deli si pikwaku biwokuva; e bikubu si keda gala wala bisakauligilaisi Yaubada. E si pikwaku kwaitala wala kaliga bibodasi.