SAM.
7.
Mwa! Guyau ulo Yaubada, lamakaiam paila mwada bakwala. Kukolaigu deli kukwatumovaigu metoya baisa komwaidosi matausina eivakulaigusi. 
Taga bivigakaigusi makawala laiyoni bikalileuwaigusi, bilauwaigusʹo ambaisa gala taitala ibodi bipilasaigu, e baisa bikomtumtaigusi. 
Mwa! Guyau ulo Yaubada, ka — kidamwa availa layogagi, kaina lakasali taitala lubaigu, kaina layogagi agu tilaula avai tuta gala isim uula paila bavagi makawala — kidamwa bogwa lavagi kwaitala sula makawala makwaisina, 
e bwaina wala bukutagwala agu tilaula bivakulaigusi e biyosaigusi. Kutagwala bikatuyowaigusi deli bikatumataigusi e biligaiwaigusi tokaliga bakanukwenu! 
Mwa Guyau! Ibodi bukutokaia deli m gibuluwa, e bukupiaigu metoya agu tilaula osi gidaleiya. Mwa! Kuvigimamalu kutokaia kuma kupilasaigu, paila yoku wala magim karaiwaga duwosisia. 
Mapaila kukouguguli tomota komwaidona, e bukuguyoi matausina metoya om valu walakaiwa. 
Yoku wala kasi toyakala tomota komwaidona ambaisa ambaisa ovalu watanawa. Mwa Guyau! Ibodi bukukwabwailigu ogu yakala, paila yoku kunikoli yeigu tobwaila wala. 
Yoku wala Yaubada tomitukwaibwaila. Kuiyakali ma nanamsasi deli avaka magimasi. Ibodaim wala bukubuyoyu si mitugaga matausina tomitugaga, e bukumapu matausina iuvagaisi bwaina. 
Yaubada matauna agu tokwala, e ikoli matausina availa availa ikabikuwolaisi matauna. 
Yaubada matauna toyakala duwosisia, e tuta komwaidona ikamogi availa availa matausina tomitugaga. 
E kidamwa gala bivigivauwaisi si kidakeda, Yaubada bogwa bisimati la kema. Bikatubiasi la kaiyala e bitulotula wala. 
E bikau guguwala kabilia e biiyamwasi la kaiyala deli kovala. 
Kugisi ammakawala tomitugaga ininanamsaisi avai mitugaga avai mitugaga. Ikikeiwalaisi avai pakula bivagaisi, e ikatuduvidavisi. 
Matausina eilaleiyasi mwada kasi sikula sesia, mitaga titoulesi wala iwawaisi. 
E mapaila baisa ibodasi kasi mipuki paila si mitugaga, e ibodasi kasi mmayuyu metoya osi segasisi. 
Anokagutoki baisa Guyau paila la karaiwaga duwosisia e ausiwosi kala yakaula Guyau Saina Towalakaiwa Sainela.