SAM.
17.
Mwa Guyau! Kunakaigali ulo yokakapisi paila karaiwaga duwosisia! E kukwatukovi taigam kulagi ulo dou paila pilasi! Kunakaigali ulo nigada kwekamokwita. 
Yoku bukukwabwailigu oyakala, paila uula yoku kunikoli avaka duwosisia. 
Yoku kunikoli nanogu. Paila kummakaiagu bugibogi, e kumitakavataigu wala tomwaidogu e gala wala kubani avai nanamsa gaga olumoulegu. 
Ulo bigatona gala bigigaga, makawala segwaia si bigatona. Bogwa lakabikuwoli m kwaraiwaga deli gala abokuli si kidakeda togigasisi. 
E tuta komwaidona aliloula wala om keda, e gala kwaitala tuta avalavi metoya makadana. 
Mwa Yaubada! Aninigada baisa yoku, paila uula kummapu ulo dou. Mapaila baisa kutovilakaigu, e kunakaigali ulo biga. 
Kukimitali makwaina m mitakwai e kukwatumovaimasi. Baisa okaipapam yakamaisi kakwalasi metoya baisa kama tilaulasi. 
Kuyamataigu makawala tomota iiyamataisi mitasi. Kukwatupwanaigu metoya okaikonigulela pinupanem, 
metoya osi womakava tomitugaga. Agu tounakaiyala eitoulaigusi eitopataigusi 
e matausina gala wala si nokapisi, e deli tokaluvalova. 
Ka, baisa tuta, ambaisa ambaisa bamitavila, bogwa wala agisi eivaulaigusi eivapataigusi, e iuwayausasi mwada bibanaisi si tuta paila biyosaigusi bisakailikaigusi pwaipwaia. 
Matausina makawala laiyoni, eitulotulasi wala paila yeigu, magisi bikomtumtaigusi wala. 
Mwa Guyau! Kuma kuvabodi agu tilaula e kukwalisau matausina! Kukolaigu metoya baisa tomitugaga metoya om puluta. 
Kukolaigu metoya baisa matausina availa availa ititaki ninasi baisa ovalu watanawa. Kumipuki matausina metoya mmayuyu makwaisina okukwatubiasi paila matausina, e iboda kesala m mipuki bisisu paila litusia, e kesalaga paila tubusia goli! 
Mitaga yeigu wala bagisaim, paila uula gala avagi kwaitala sula, e avai tuta bamamata, yoku goli bukusikailigu e mauula nanogu bimwamwasila sainela.