SAM.
21.
Mwa Guyau! Ma guyausi imwamwasila nanola, uula wala bogwa lokukwatupewoli matauna. Imwasawa uula wala kuvigaki matauna itomgwaga. 
E bogwa lokusaiki matauna avaka magila. Bogwa lokumapu la kapuloki. 
Bogwa lokumakaia matauna deli kala mitakwai kwevakaveka, e lokusaili kala kulupaipi goula opwanetala. 
Matauna einigadaim paila momova, e yoku bogwa lokusaiki. Lokusaiki momova kwaiwonaku deli kwekanigaga. 
Kala katububula saina isiligaga, uula wala m pilasi, e bogwala kuvigaki matauna eigiyouveka deli tomota si kabosailiu. 
M mitakwai baisa matauna gala wala biwokuva, e lokusikaili matauna mauula wala imwasawa. 
Da guyausi idubumi Guyau Topeuligaga. E matauna bisibwabwaila wala, paila uula Guyau la mitakwai. 
Da guyausi bikatupipi komwaidosi kala tilaula, e bikatupipi komwaidosi availa availa idokaisi matauna tokukolosi. 
E avai tuta biviloubusi, bivigaki makawala kovasupa bivakadoum matausina. Da Guyausi bikatudoum matausina metoya ola gibuluwa, e kova igau bivakamkulovi matausina. 
Gala taitala dalesi bikesa, paila guyau matauna bikatumtuwoli wala komwaidosi matausina. 
Bogwa ikeiwalaisi matauna paila bikatumataisi, mitaga gala wala bipeulasi. 
Matauna bikaligigai matausina okaiyala, e bivigaki bitovilasi bisakaulasi. 
Mwa Guyau! Kayakawolaimsi, paila m peula saina vakaigaga. Bakausiwosisi deli bakayakawolaimsi yoku Topeuligaga.