SAM.
27.
Guyau matauna ulo kaitapa deli agu tokwatumova. Yeigu gala wala bakukoli availa. Guyau bikolaigu e gala basilagi, mapaila gala wala avai tuta bakokola. 
Kidamwa tomitugaga iyosaigusi mwada bikatumataigusi, isilibeibeusi e ikapusisi. 
Kaina goli tokwabilia budumwaidona bitoulaigusi, e gala wala bakokola. Kainaga tilaula biyosaigusi, mitaga badubumi wala Yaubada. 
Bogwa lanigada baisa Guyau mwada kwaitala wala vavagi bisakaigu, e kwaitinidesi wala vavagi magigu. Magigu basisu Guyau ola bwala ogu tuta komwaidona, e baisa batulaula paila la bobwailila deli banigadi bivakadaigu. 
Paila matauna bikatupwanaigu kidamwa avai tuta baboda mwau. Bikolaigu ola Bwala Kwebumaboma, e bisailigu bakwala odabala dukutotu kwaiveka. 
E mapaila yeigu batomgwaga odubasi agu tilaula eitoulaigusi. Bagova deli mwasawa e bagabu lula ola Bwala Kwebumaboma. Bausiwosi e bayakawoli Guyau. 
Mwa, Guyau! Bukulagaigu tutala adidouwaim. Bukunokapisaigu e bukumapu ulo dou. 
Tuta matutona lokukwaibiga, “Kumaisi bukutapwarorusi baisa yeigu,” e yeigu lavitakaula, kawagu, “Guyau, bogwa bawa. 
Taga bukukwatupwanaim metoya baisa yeigu!” Taga kugibuluwaigu, e gala bukuyabaigu, yeigu m towotetila. Yoku bogwa lokupilasaigu. Mwa! Yaubada agu tokwatumova, taga kusilavaigu e taga kuligaimwaigu. 
Kaina tamagu inagu biligaimwaigusi mitaga yoku Guyau bukuvaulaigu goli. 
E Guyau, bukuvitulokaigu avaka nanom mwada bavagi, e kuvakadaigu ambaisa gala baboda silagi, paila uula bidubadu agu tilaula isisuaisi. 
Taga bukuligaiwaigu baisa agu tilaula paila iwaigusi osi sasopa deli si vitukokola. 
Anikoli kidamwa igau wala basisu tomomova e bagisi Guyau la bobwailila. 
Kudubumaisi Guyau. Kupapeulasi wala, taga kusaimwaisi pikwaku. E kudubumaisi Guyau.