SAM.
53.
Tobubeikam ininamsaisi titoulesi kawasi, “Yaubada gala wala avaka!” Komwaidosi matausina saina gaga, e ivagaisi vavagi makwaisina kabokakayuwa. Gala avai tomota isisu tomitukwaibwaila. 
Yaubada wa labuma ikululuki mina watanawa, mwada bigisi availa isisu tokabitam, e availa ititapwaroru baisa matauna. 
Mitaga komwaidosi wala bogwa eisulasi, komwaidosi goli kasi gaga makawala wala. Gala avai tomota isisu tomitukwaibwaila, gala goli availa. 
E Yaubada ikatupoi kawala, “Ki, kaina gala inikolaisi? Ki, tomitugaga komwaidosi matausina tobubeikam wala? Paila ititakunasi kʹasi metoya ililebwaisi ulo tomota, e gala avai tuta bininigadasi baisa yeigu.” 
Igau wala matausina bikokoluvagasisi, gala avai tuta omitibogwa ilumkolaisi makawala. Paila Yaubada bikatugai totuwanesi la tomota kasi tilaula. Yaubada ikoulovi matausina, e mapaila mina Isireli bitomgwagasi odubasi. 
Baisa ulo nigada, kidamwa mina Isireli bibanaisi si tomgwaga bima metoya mapilana Saiyoni. E matutona Guyau bimitukwaii mina Isireli tuvaila, e bogwa goli bimwasawasi, si mwasawa saina kwevakaigaga.