SAM.
63.
Mwa Yaubada! Yoku ulo Yaubada. Yeigu avinagai paila yoku, e tomwaidogu goli magigu yoku. Yeigu makawala viloupakala valu vilouwokuva wala, e makawala valu magila sopi, yeigu magigu yoku. 
Bukutagwala bagisaim om Bwala Kwebumaboma, e mwada bagisaim yoku Topeuligaga e Toguyugwayu. 
M mitakwai ikalisuwoli momova kala bwaina, e mauula bayakawolaim. 
Ogu tuta momova komwaidona, banokagutoki baisa yoku, e bayosali yamagu banigada baisa yoku. 
Bilomagu bikam e bikomata, e deli ulo mwasawa bawosi kam yakaula. 
Wa bogi akanukwenu e aluluwaim. Wa bogi kwemwaidona aninamsaim. 
Paila yoku tuta tuta lokupilasaigu. Okaikonigulela pinupanem ausiwosi deli ulo mwasawa. 
Yeigu akaipapaim, e yamam ikolaigu. 
Matausina availa availa mwada bikatumataigusi bibusisi wala bilosi mapilana Tuma. 
Bikaligasi wala okabilia, e ugiwagi nagigasisi bikomasi uwosi. 
Yaubada bivigaki guyau bitomgwaga, e mapaila guyau matauna bimwasawa! Availa availa ikatotilasi omatala Yaubada, matausina goli biyakawolaisi matauna. Mitaga Yaubada bikatupatu udosi toubuwabu.