SAM.
83.
Mwa Yaubada! Gala bukulumgwa wala bukusisu! Gala bukuminumki wala, deli gala bukukwapatu 
Mwa! Kugisi, kam tilaula bogwa eikosomapwaimsi, deli matausina eivigakaimsi tokukolosi eikikominimanisi baisa yoku. 
Matausina eikiumsi eininamsaisi mwada biyogagaisi m tomota, e ikikeiwalaisi matausina availa availa lokukoli. 
Kawasi, “Kumaisi, tamwaisi takatudoumwaisi mabudona si boda, e mapaila baisa mina Isireli kasi luluwai bitamwauvagasi.” 
Matausina bogwa eininatalasi avaka eininamsaisi, e leikatukwaitalasiga mwada avaka bivigakaimsi. 
Matausina goli mina Edom deli mina Isimeili, mina Mowabi deli mina Agiri, 
mina Gebali, mina Amoni deli mina Amaleki, e mina Pilisitia deli mina Taia. 
Mina Asiria tuvaila bogwa eisepitukwaisi deli matausina tubula Lota, matausinaga mina Amoni deli mina Mowabi, e ivigaki si katukwaitala saina peula. 
Kuvagi baisa matausina makawala avaka lokuvigaki mina Midiani, deli avaka lokuvigaki Sisera sola Yabini mapilana wa Waya Kisoni. 
Yoku kukwalisau matausina mapilana Enidora, e uwosi isoboginasi wala opwaipwaia. 
E kuvagi baisa matausina kasi tokugwa makawala avaka lokuvigaki Oreba sola Seeba. Kukwalisau komwaidosi kasi tokwaraiwaga makawala lokuvigaki Seba sola Salumna. 
Matausina eilivalasi kawasi, “Bitayoulisi Yaubada la pwaipwaia e bitayosisi da pwaipwaiasi.” 
Mwa Yaubada! Kubutugigai matausina makawala tubumyou, e makawala goli wawa yagila biyuvisau bilau. 
Kubokavili matausina bilosi metoya om utuyagila, e kuvitukukoli matausina metoya om yagila saina minimani, makawala kova eigigabu lawodila, e makawala goli mayela kova eilululu otapwala koya. 
Mwa Guyau! Kuvigaki migisi bidavila e mmosila wala bikatumati, e kuvagi bisimokwitasi m peula. 
Ibodi matausina bimamasi deli bikokolasi tuta komwaidona, e ibodi bikaligasi deli kasi mmosila sainela. 
Kuvagi binikolaimsi yoku kammwaleta wala Guyau, e yoku wala Giyoumatala odabala pwaipwaia komwaidona.