SAM.
91.
Availa bilokaia Guyau paila bikwala, e availa Yaubada Topeuligaga bikoli, 
matauna gagabila biluki matauna, kawala, “Yoku agu taboda e agu tokwala. Yoku ulo Yaubada, e yoku goli adubumaim.” 
Matauna biyamataim metoya avai kabosilagi kwekatupwana, e metoya avai lelia saina mwaugaga. 
Matauna bivakanunuvaim opinupanela, biyamataim e yoku bukusibwabwaila. Matauna Tokimadagi bikolaim e bitabodaim. 
Gala ibodi bukukukoli avai silagi wa bogi, kaina availa biwaim wa yam, 
kaina avai lelia biyogagaim odudubila, kainaga avai vavagi mwau bikatumataim lalavi. 
Kaina lakatuluwotala bikaligasi otalim, kainaga lakatuluwovila bibodasi kaliga om kwakata, mitaga yoku gala avaka biyogagaim. 
Bukumitakavati e bukugisi ammakawala tomitugaga bibodaisi kasi mipuki. 
Paila Guyau lokuvigaki m vayoula, e Yaubada Towalakaiwa kam tokwala. 
Gala avai kabosilagi biyogagaim. e gala avai togigasisi bivakatitaikina om valu. 
Yaubada bisaiki la anelosi kasi pakula biyamataimsi e bikolaimsi ambaisa ambaisa bukula. 
Oyumasi bikauwaimsi, taga biwaiya kaikem dakuna. 
Bukuvapupoi laiyoni deli keiyuna, laiyoni nagigasisi deli keiyuna naiyayana. 
Yaubada kawala, “Availa availa iyebwailigusi bakatumovi, e bakoli availa availa idokaigusi Guyau. 
Avai tuta bidouwaigusi, yeigu bamapu matausina. Avai tuta bibodasi mwau, yeigu basikaili matausina. Bogwa bakoli e balupi okabasi walakaiwa. 
Yeigu basaiki kasi mapu si momova bakatududuli e yeigu bakoli matausina.”