SAM.
102.
Mwa Guyau! Kunakaigali ulo nigada, deli kulagi ulo dou paila pilasi! 
Avai tuta wala baboda mwau, gala bukutotubulokaigu! Kunakaigalaigu, deli nanakwa kumapwaigu avai tuta badou. 
Ulo momova eititamwau makawala mseu, e wowogu ilululu makawala kova. 
Yeigu iwaigusi akapusi makawala mnumonu yamitamata, e kaula kala nanamsa alumwelavi. 
Akapiniveka kayagigila. Yeigu eideli wowogu totuwanawokuva wala yeigu. 
Yeigu makawala mauna nabubolodila oviloupakala, e makawala kuru itotu oviloububu. 
Akanukwenu wala ammamata, e yeigu makawala nagumalawa mauna nayoyowa itotu okulumwala. 
Yam kwemwaidona agu tilaula ibigigagaigusi. Matausina iyosokanaigusi, yagagu ivigakaisi si bolata baisa sesia. 
Paila wala m gibuluwa deli kam leiya tubwaga avigaki kʹagu, e deli mitilagigu itaguliki agu sopi. Yoku kulupaigu e kulavaigu alʹo. 
Ulo momova makawala dubilikoyavi, e yeigu makawala mnumonu yamitamata. 
E yoku Guyau, yoku goli Guyau Tosivagasi. Tubwa komwaidona biluluwaimsi goli. 
Yoku igau bukutokaia e bukunokapisi mapilana Saiyoni, paila tuta bogwa leima paila mapilana ibodi bibani kala nokapisi, e baisa tuta kala tuta mokwita. 
M towotetila komwaidona iyebwailisi wala mapilana, ilagoli kaina bogwa eidadaimi. Matausina inokapisaisi wala mapilana, ilagoli kaina bogwa eiviloububu. 
Boda ituwoli ituwoli bikukolaisi Guyau, e guyousi watanawa komwaidosi bikukolaisi la peula. 
E avai tuta Guyau bikaliivau mapilana Saiyoni, e matauna igau biyomitali la tovakaigaga. 
Matauna igau bilagi la tomota matausina omitibogwa eisilavi e binakaigali si nigada. 
Ibodi bitagini avaka Guyau bogwa leivagi paila tubwa igau bima bikalawasi, e mapaila baisa tomota matausina igau gala bikaloubusisi ibodi biyakawolaisi matauna. 
Guyau ikululuki metoya ola kabosisu kwebumaboma walakaiwa, e metoya wa labuma ikululukiga valu watanawa. 
E ilagi si kayagigila tokatupipi, deli itaneku matausina availa availa kasi mipuki kaliga. 
E avai tuta boda ituwoli ituwoli deli kabokwaraiwaga ituwoli ituwoli bimaisi gulitinidesi e bitapwarorusi baisa Guyau. E matausina bikamitulaisi yagala mapilana Saiyoni, e deli biyakawolaisi matauna mapilana Yerusalem. 
Igau otubovaugu Guyau ivigaki wowogu kala mama, e matauna iutupwi ulo momova. 
Mwa Yaubada! Gala bukukwatumataigu, paila igau gala bilokaia agu tomoya. Yokugwa Guyau tosivagasi goli! 
Omitibogwa yoku kububuli watanawa, e yamam titoulem kububuli labuma. 
Komwaidona bitamwausi, mitaga yoku bukusisu wala. Komwaidona bigagasi makawala kakapula yadadaimi. Yoku bukuligaim makawala kakapula, e komwaidona bitamwausi. 
Mitaga yoku tuta komwaidona migim migitinidesi wala, e deli m momova gala kala kalitutila. 
Litumaiasi bisisuaisi luvala wala uwosi, E tubusia bisibwabwailasi metoya om yamata.