SAM.
113.
Kala yakaula Guyau! Yokomi Guyau la touwata, kuyakawolaisi matauna! 
Mina watanawa bikavisaisi matauna tuta baisa e tuta gala biwokuva. 
Metoya opilibomatu bila opilikwaibwaga kuyakawolaisi matauna Guyau. 
Guyau ikikaraiwogi komwaidona boda ituwoli ituwoli, e la guyugwayu saina walakaiwʹo odabala labuma. 
Gala wala taitala makawala Guyau da Yaubadasi. Matauna la kabosisu saina walakaiwa sainela, 
mitaga ikululuki igigisi labuma deli valu watanawa. 
Isimiliwoli tonamakava metoya opwaipwaia, e ilupi togumalawa metoya okasi mmayuyu, 
e deli ivigaki bikalubailasi deli gweguya, matausina la tomota si gweguya goli! 
Isaiki minana nakaliga kala taimamila ola valu, e iyomwasali minana paila bogwa eivigaki bivalulu. Kala yakaula Guyau.