SAM.
116.
Yeigu ayebwaili Guyau, paila ililagaigu. Inakaigali ulo nigada. 
Avai tuta badou baisa matauna e tuta tuta inakaigalaigu goli. 
Kabosilagi mwau itoulaigusi, kala kakayuwa laka iyosaigu e agu kokola sainela iwouwouya nanogu. 
E mapaila ayokakapisi baisa Guyau, kawagu, “Mwa Guyau! Anigadaim bukukolaigu.” 
Matauna Guyau tonokapisi deli giyoubwaila Da Yaubadasi matauna kada kwabusi oda tutasi mwau. 
Guyau ikoli tomamama. Avai tuta laboda kabosilagi e matauna ikolaigu. 
Gala wala ibodi baninayuwa, paila Guyau bogwa eimitukwaibwailigu. 
Guyau ikolaigu metoya kaliga ikatupewolaigu e gala basilibeibeu, e baisa ivigaki waisala mitilagigu. 
E mapaila aliloula wala omatala Guyau baisa osi valu tommomova. 
Yeigu kawagu, “Ka, bogwa laboda saina mwaugaga,” mitaga adubumi wala Guyau. 
Kalubikoya akokola e kawagu, “Gala badubumi availa!” mitaga gala wala asim kala dubumi Guyau. 
Avai vavagi ibodi basaiki Guyau mwada bamapu la bobwailila baisa yeigu? 
Bogwa basemakavi waini bavigaki lula baisa Guyau, e makawala banokagutoki baisa matauna paila eikolaigu, 
e baisa osi sigugula la tomota bogwa goli basaiki matauna makawala ulo biga katotila. 
Kidamwa taitala Guyau la tomota bikaliga, bogwa goli bimmayuyu nanola Guyau. 
E Guyau, yeigu m towotetila, e awotitalaim makawala inagu eivigakaim. Yoku goli lokukolaigu metoya kaliga. 
Bogwa basakaim ulo lula lulela nokagutoki, e banigada baisa yoku. 
Baisa osi sigugula komwaidosi m tomota e olumoulela m Bwala Kwebumaboma mapilana Yerusalem, bogwa goli basakaim makawala ulo biga katotila. Kala yakaula Guyau!