SAM.
132.
Mwa Guyau! Taga kulumwelavi Debida, deli goli komwaidona makwaisina vavagi mwau eibudoboda. 
E Guyau, kululuwai avaka eikatotila bivagi. Kululuwai ammakawala eilivala biga katotila saina mwau baisa yoku, Yekobe la Yaubada Topeuligaga. 
Kawala, “Gala wala bala ovalu, e gala bakenu okabagu. 
Gala bavaiwasi, e gala bamisiki moi, 
tatoula wala bayoudila Guyau la kabosisu, e bakaliai la bwala matauna Yekobe la Yaubada Topeuligaga.” 
Mapilana Bedeliem kasisuaisi kalagaisi bulogala makwaina Kabutu Didawogala, e kabanaisi makwaina okubilela Yearim. 
E kawamasi, “Ibodi bitalokaiasi ola bwala Guyau, e bitatapwarorusi baisa omatala la takaikaia.” 
Mwa Guyau! Bukuma wa Bwala Kwebumaboma, deli makwaina Kabutu Didawogala, makwaina ikibuboti m peuligaga. Bukuma e bukusigaga baisa. 
Ibodi m tolula tuta komwaidona biwotetilasi duwosisia, deli m tomota bigovasi deli mwasawa. 
Bogwala kulivala biga katotila baisa Debida m towotetila E Guyau, taga kupaiki guyau matauna yoku lokunagi. 
Lokulivala biga katotila mwau baisa Debida, e gala goli bukukwaimali makwaina katotila. Kawam, “Taitala litumwa bavigaki biguyau, e matauna igau kaimapum bikaraiwaga. 
Kidamwa litumwa tauwau tuta komwaidona bivagaisi makawala ulo kabutu, e bikabikuwolaisi ulo karaiwaga makwaisina lasaiki matausina, e ka, litusia tuvaila biguyausi odalem tuta goli gala biwokuva.” 
Guyau bogwa einagi mapilana Saiyoni, e magila bimili valu baisa. 
Kawala, “Mapilana valu goli basigaga tuta gala biwokuva. Magigu bakaraiwaga metoya baisa. 
Bogwa bamitukwaii mapilana Saiyoni, basaiki komwaidona avaka ibodi biyosi, e bogwa bavakoma tonamakava e bikomatasi. 
Bamitukwaii la tolula paila komwaidona avaka avaka bivagaisi, e deli tomotala biusiwosisi bigougovasi deli mwasawa. 
Mapilana valu bavigaki taitala Debida dalela bigiyouveka, mapilana bayamati la karaiwaga matauna guyau lanagi. 
Bogwa bayomsili sainela kala tilaula, mitaga matauna la kabokwaraiwaga bipeula e bisiniveka goli.”