BIGIVAKALA.
9.
Kabitam bogwa leikaliaii la bwala e kokola kasi bawa kailima kaiyu. 
Minana bogwa eikatumati natana kala bunukwa paila kala paka, e itaguliki kai yekwesila ituwoli ituwoli deli waini, e ikatubiasi kabokamkwam. 
Minana bogwa eiwitali la nawotetila eilosi okubudoga ovalu eidoudousi kawasi, 
“Kumaisi, kusuvisi yokomi tolubulobwaga!” E baisa totubunagowa iluki kawala, 
“Kumaisi kukomasi kʹagu deli kumomwaisi kagu waini makwelana bogwa lataguliki. 
Kusilavaisi mabudona tolubulobwaga, e bukusisuaisi bwaina, E kubokulaisiga kidikedala ninitalapula.” 
Ka, kidamwa bukukiduwosisii taitala nanola walakaiwa, mesinaku wala bikagagaim. E kidamwa bukukwamitilaki taitala tomitugaga, mesinaku wala biyomiyuyaim. 
E gala avai tuta bukukiduwosisii taitala nanola walakaiwa, paila igau bivigakaim tokukolola wala yoku. Mitaga kidamwa bukukiduwosisii taitala tokabitam, bogwa wala bitemmalaim. 
E avai biga bukuluki matauna tokabitam, bogwa bikatumkulovi la kabitam. E avaka bukuluki matauna tomitukwaibwaila, bogwa bikatumkulovi la ninitalapula. 
Kidamwa bukukwabitam ibodaim wala ikugwa bukukwabikuwoli Guyau. Kidamwaga kunikoli matauna Tobumaboma, e yoku bogwa kuyosi ninitalapula. 
Kabitam bikatumkulovi kam taitu om tuta tomomova. 
Kidamwa yoku isim m kwabitam baisa yoku wala kam bwaina, e kidamwaga bukupaiki, yoku wala kam mmayuyu. 
Tubunagowa makawala natana vivila minana nabigidadawa, nalubulobwaga deli gala wala isim kala mmosila. 
Minana bisili wa lulu ola bwala, kaina okubudoga ovalu, 
e bidoudou baisa tomota matausina bililoulalsi gala togia uwosi kawala, 
“Kusuvisi kumaisi yokomi tolubulobwaga!” E baisa toninagowa biluki kawala, 
“Sopi kweuveilau saina simokainigaga. Kaula kweuveilau kala kamkwam saina bwainigaga.” 
Minana la tauwau gala wala inikolaisi paila tomota ikikaligasi avai tuta eilokaiasi minana ola bwala, e availa availa matausina bogwa eisuvisi, baisa tuta bogwa eisisuaisi wa Tuma.