SOLOMONI KALA WOSI.
2.
Yeigu makawala lalela Saroni kebolodila, makawala bwaimwara eitotusi oitayatila. 
Makawala kaitala bwaimwara eitowalai kaigunigwaini e makawala goli minawena lubaigu oluwalaisi vivila komwaidona. 
Makawala kaitala mokolu eitowalai kai komwaidona, e makawala goli matauna lubaigu oluwalaisi tauwau komwaidona. Saina ayebwaili basisu okaikonigulela, e uwala la kamkoni saina simokainigaga. 
Ilauwaigu obolela la kabokamkwam e matauna iyomitali agu yebwaili. 
Ka, bukukwatupewolaigu metoya kaiuwala waini, kuyomosalaisu metoya mokolu! Mapaila namwaidogu wala nakaliga baisa matauna. 
Yamala kikiwama avigaki agu kwabaikunu e yamala kakata iyobobwaigu. 
Yokomi vilemi Yerusalem, ibodaimi bukukwatotilasi mwau, mwada gala bukuyobosaimasi sogu lubaigu. 
Aligitoi kaigala lubaigu. Odubiluwotala koya leisisakaula leima, leiluvapela odubadabila leimmakaiagu. 
Lubaigu makawala natana dia, makawala natana namwala dia natubovau. Matauna itotu opapala taboda. E ititadoyai oponana e immitikipwana wa ninuva. 
Lubaigu ilukwaigu kawala. Tau Ve, lubaigu, kumakaiagu, nambwailigu, kuma bitam. 
Ka, tula kweluvala bogwa leiwokuva e kuna bogwa leidoudewa; 
valu viloutuboulola, lala bogwa leikatuyawaisi. E baisa tuta la tuta wosi wala; ka, kulegʹe bubuna leikukumdusi osaivau. 
Seuseu bogwa leimwenakavalasi; e matamsina waini lalela eipuyumi valu. Ve, lubaigu, kumakaiagu, nambwailigu, kuma bitam. 
Yoku makawala natana bubuna minana eikanupepuni okatakila dakuna. Ve, kusunapula bagisi migim bwaikwanela, e sitana balagi kaigam, biluba lopogu. 
Kuyosisi minasina ugiwagi, minasina nakikekita, taga bivagudaisi da sobulasi matamsina da wainisi, paila tuta baisa goli eilalalasi. 
Yeigu lubaigu matauna, e matauna lubaila yeigu. Iuvakam la yawa olukuvala bwaimwara 
e biyayosa wala tatoula bulubuvisiga bimya kala suwonumla bima e kawala yam biyumki. Mwa, lubaigu, kukwaimilavau kuma, makawala natana dia, kaina makawala natana nagwadi dia namwala odubiluwotala koyala Beteri.