SOLOMONI KALA WOSI.
7.
Ve, saina namanabwaita yoku! Bwaikwanelaga lokuvakouya kapolela kwaibakwaim. Kwaipiapam dodogala tadoki wala si katuduvidavi toyoudulesi tokolu. 
Ka, kwelatala bolu mekikanaikila baisa, e makwelana sopila gala avai tuta bimada. Gulotala taitu makawala geu metitokila baisa, e bwaimwara itavini itapatu. 
Nunum nupiakwa, kala gigisa makawala nupoyu dia, kaina makawala nayu nagugugwadi dia. 
Kaiyom kala gigisa saina bwaina makawala kwaitala bolela vatoi leikatububulaisi metoya doga. E matam kala gigisa makawala sopila vilouveka Esiboni makwaisina opapala kalapisilela mavilouna vilouveka. Kabulum saina keminabwaita, tadoki wala mina Lebanoni si bwala vatoi makwaina leikounakaila valu Damasiko. 
Dabam leikuva makawala Koya Kamela. E kulum lokuvili leivivivila makawala miyasina karekwa yammanum deli yakavikavila, e kala gigisa wala ibodi bikau nanola guyau. 
Ve, bwaikwanelaga kam gigisa, saina namatabwaila yoku, m kwatugweimila ketigamla wala lopogu. 
Kam kwebisibasi makawala kaitala pulopola, e nunum makawala goli mabikosina kaiuwala. 
Yeigu bamweni makaina pulopola e bakiuya kaiuwala. Nunum kala lumkola makawala bukulela waini, e m yagisa kubowala makawala mokolu maiinela, 
e wodom kakamwenala makawala dilimoya waini. Vivila Ibodi wala waini makwaina bitayelu bisaitaula bilokaia lubaigu, bitayelu bila obilubalola deli okudula. 
Namwaidogu wala lubaigu la vavagi, e matauna saina nambwailila yeigu. 
Mwa lubaigu, kuma bitam wa lolia, e bitakanawa wala obuliyamata. 
E kaukwautoula wala bitamamata e bitavakawoli matamsina da sobula kaina bogwa leiulisalalasi deli makaisina gigiku lalela bogwa leisisisi. E makatupona wala bayomitali ulo yebwaili. 
Ka bogwa lokusikoni maiinela koiwaga, deli komwaidona makwaisina kawailuwa kwemmatabwaila oda kaukweda. Mwa lubaigu, ka, da katudabuma makwaisina kwaibubogwa deli kwaiwovau lasisii wala.