AISEA.
25.
Guyau, yoku ulo Yaubada; yeigu batemmalaim e bayakawoli yagam. Vavagi bidubadu bogwa lokuvagi kaboyowalula; deli makawala nanom yoku bogwa lokuvagi avaka m nanamsa lokuninamsibogwi omitibogwa. 
Yoku kukodidaimi valu vilouvakaveka kuvigaki makawala kabolovala wawa deli kukodidaimi kalisi kwepapeula. Ligisa makwaisina kada tilaulasi leikaliaiisi bogwa leitamwauvagasisi. 
E boda ituwoli ituwoli kwepapeula biyakawolaimsi; e osi valu boda mabudosina mina yommayuyu bikukolaimsi. 
E mina namakava deli mina mamama eikayolasi eiwokaiamsi e bogwa eikwalasi osi tuta mwau. Yoku si kabosipepuni metoya utuyagila deli kasi kaikonigula metoya tigininila kalasia. Tilaula mina dubakasala bisuyaisi kulusi makawala utuyagila bikoulusa otutala katubugibogi, 
deli weigigi tigininila oviloupakala. Mitaga yoku Guyau, bogwa lokuvigaki kada tilaulasi luvilova kutukwatu yoku bogwa lokukimati si kauwaileku matausina tomota mina yommayuyu, makawala kumum tulela tutala bituma matala kalasia. 
E odabala Koya Saiyoni Guyau Topeuligaga bikatubiasi kwaitala paka paila komwaidona boda ovalu watanawa - kalagila paka makwaina leikatubiasi kaula kalamatabwaila deli waini wainitoula. 
Metoya baisa matauna saina nanakwa bikau biligaim lowalowala ninamwau mapilana eikuboli odubasi boda komwaidona. 
Guyau Topeuligaga bikatudidaimi kaliga la peula, e gala tuvaila bisisu! Matauna biwaisi mitiligisi tomota komwaidona deli bikatulilisi kasi mmosila matausina metoya avaka leilumkolaisi ovalu watanawa komwaidona. Guyau titoulela bogwa leilivala makawala. 
Avai tuta bikaloubusi makawala, tomota komwaidona bilivalasi kawasi, “Matauna goli da Yaubadasi! Da dubumaisi bogwa tavatobusi baisa matauna, e matauna bogwa eikolaidasi. Matauna goli Guyau! Da dubumaisi bogwa tavatobusi baisa matauna e mapaila baisa tuta deli wala da mwamwasilasi e da mwasawasi gala bitakaibiga paila matauna bogwa leikatumovaidasi.” 
Guyau igau bikoli Koya Saiyoni mitaga bivakikili mina Mowabi, makawala yogilimwamwaisa bivakikilaisi deli bulutuvalu pwasi. 
Matausina bivitukolaisi yumasi bititeiwolasi makawala obolita bikakayasi, mitaga Yaubada biyomsili matausina, yumasi bimama e bidagugu. 
Matauna bikatudidaimi Mowabi kalila kwaiwonaku deli kwaipapeula bisiyeila bila opwaipwaia.