Khe Hibruiŋ Ndi Khergi Gap.
1.
Fhum, tugi vhɨrvera, Fhe Bakɨme wo buni shɨgap bisaŋ bisanera won kamthooŋ gumgi ga ndɨɨim, mbe mba bunin nzan nzɨgi ga suaŋgi. 
Ntigem kha tugen, kha mpuu tugivigen, Fhe Bakɨme buni vhuuiŋ ana ntan won Kama nɨɨŋgi, ana won kamthooŋra mba buni bun nza nzuai. Fhe Bakɨme anan farve panan, ana kha nuian gu buiva muuŋgi. Fhe Bakɨme mba Kam, ana ana farasarigi, ana za kha bigi ndirga. 
Mba Kam, ana Fhe Bakɨme tɨvir vhuuin ŋkasŋka bakɨmen nza khɨvigim, mba tɨvir vhuuin ŋkasŋka bakɨme, nza ana gari. Ana tɨvir vhuuin ŋkasŋka bakɨme, ana Fhe Bakɨme tɨvir vhuuin ŋkasŋka bakɨmera fara muuŋgi. Ana buni ŋkasŋka ki. Ana mba bunin panan, ana za kha bigi ga muuŋgim, nta havhargiap, mbara muuŋgiap ki. Ana won ŋaara mbuav, kha nuianan ki gumgi gu mbigi ga nzuav tuav ga muuŋgim, tɨvi mbatɨgi, ana nta vhɨzgip, mbe muuŋgirim, mbe ŋgararga. Ana mbara vun ndap, za kha bigi kharar vu guarara ki ŋkasŋka ki ŋgui vhɨrve gari guman panan guva haren mpirmpirɨga perigi. 
Fhe Bakɨme won Kama muuŋgim, ana mba Fhe Bakɨme enseri kambarigi. Maaŋ muuŋgiap, ana vhɨra zɨ bakɨmen won Kama nɨɨŋgi. Ana mba Fhe Bakɨme enserir zɨri gum mben ŋkasŋkagi, ana guigira nta kambarigi. 
Fhe Bakɨme fhum khaŋ won enser the suaŋgire, “Ndu nan Kam ma. Gu ntigem ndun Ndia ki.” Ee, Fhe Bakɨme khaŋ mba enser the suaŋgire, “Gu ndun Ndia kɨrga, ndu nan Kam kɨrga”? Zakɨra fhuvara! 
Ana mba fharigi Kama bavira, ana ana sararim, ana kha nuianan zirɨr zav, ana khaŋ nzuai, “Kha na enseri, mbe za ana rotur muuŋv, ana piin kɨri.” 
Fhe Bakɨme mba won enseri ga ndɨkndɨgiap khaŋ suaŋgi, “Gu won enseri, gu mbe muuŋgi, mbe bɨɨŋbɨɨŋ fara muuŋgi. Gu won ŋaara gumgi, gu mbe mbuim, mbe guigira vhava zira fara muuŋgi.” 
Ana khaŋ won Kama nzuai, “Ndu, Fhe Bakɨme, ndu ŋgui vhɨrve gari guman pan ki. Ndun ŋkasŋka zazera mbara muuŋgip kɨrga. Ndu tɨvar vhuuŋra zɨn ŋgɨp, won gumgi gu mbigi ganɨnga. 
Ndu tɨvir vhuuiŋra vuzvugap, ndu tɨvi mbatɨgi, ndu guigira nta thagi. Maaŋ muuŋgiap, ndun Fhe Bakɨmera, ana ndu farasarav, zɨ bakɨme ndu nɨɨŋgi. Ana maaŋ ndu muuŋgi, ndu guigira ndikndigɨrga. Ndu ndikndigi ndikndik, ana guigira ndun khurkhur ndikndigi kambarigi.” 
Fhe Bakɨme vhɨra khaŋ won Kama nzuai, “Guma Bakɨme, ndu fhum fhara guarara kha nuiana muuŋgiap, ndu won farvenira kha buip gum anan ki bigi ga muuŋgi. 
Ndu muuŋgi bigi, nta za vhɨzgirga, ndu zazera mbara muuŋgip kɨrga. Ndu muuŋgi bigi, nta vhɨra shagi shɨgeri farar muuŋgip shɨgi rɨrga. 
Ndu ruga hav shari shaa dɨɨi farar muuŋgip, ni dɨmgirga. Ndu shaa mbe mbatɨgim, ndu harigi ne ndi fara muuŋgi tɨvar manin muuŋgirga. Ndu, ndu zazera mbara muuŋgiap ki. Ndu won tɨvi gu bunin kurkurigi ne fhuvara. Ndu zazera mbara muuŋgip kɨrga.” 
Fhe Bakɨme khaŋ wo enser the suaŋgi fhuvara, “Ndu zɨv, na han nan guva haren perav kɨrim, gu ndun pana gumgi ndiv ndu piiŋ khɨngirim, mbe ndun piin kɨrga.” Zakɨra fhuvara! 
Fhe Bakɨme enseri, mbe ŋiniŋgi ma. Mbe Fhe Bakɨmen ŋaara mbui ntɨɨri ma. Fhe Bakɨme mba taagia ndir za mbui gumgi, ana mbe sasarigi, mbe vov mben kurkurigi.