2
Banduenga bayenda tala Yesu
1 Yesu ku Betelemi kabutukila, divula didi mu tsi yi Yuda, mu thangu ntinu Elode. Yesu bu kabutuka, banduenga, batu beti longuka zimbuetete batotukila ku ndambu Esite, bayiza totuka ku Yeluzalemi, bayuvula :
2 —A kuevi kuidi Ntinu Bayuda, wowo butukidi e ? Bila tumueni mbueteteꞌandi thama ku ndambu Esite, diawu tuizidi muingi tumbuongimina.
3 Ntinu Elode bu kawa mambu momo, mayindu mandi mayama mu diambu di kiuvu kioki bayuvula, niandi ayi basi Yeluzalemi baba ku tsi mayindu. 4 Elode wutumisa bapfumu boso ba banganga zi Nzambi ayi minlongi mi Mina, wuba yuvula kani kuevi Mesiya kela butukila.
5 Bamvutudila :
—Wela butukila ku Betelemi didi mu tsi yi Yuda bila mbikudi wusonika :
6 A ngeyo Betelemi, divula didi mu tsi Yuda,
Kadi sia ti ngeyo lutidi keva mu minyadi mioso mi Yuda,
bila mu ngeyo muela totukila Pfumu ;
niandi wela ba nsungi wu batu bama, Iseli.
7 Buna Elode wutumisa mu kitsueki banduenga ayi wuba yuvula thangu mbi yitotuka mbuetete. 8 Bosi wuba tuma ku Betelemi, ayi wuba kamba :
—Yendanu kuna ayi lutomba buzabila bumboti mambu madi mu muana beni. Beno kummona buna luiza khambi muingi mamvama ndienda mbuongimina.
9 Buna bamana wa ntinu, bayenda kuawu. Buela zimbukila mbuetete yoyi batuama mona ku Esite yi buela bamonikina, yawu yiba tuaminina ku ntuala mu nzila nate yiyenda telama va yilu buangu kiba muana. 10 Khini yiwombo yiba yawu buna bamona mbuetete. 11 Bakota muna nzo, bamona muana ayi ngudi andi Maliya, batumbu fukama vaba muana, beka ku mbuongimina. Bosi banianguna zitsaku zi banata, muba makaba ma bavana muana : nolo, ansa* 2.11 ansa : madi maka maba totulanga nti wuba ku Alabi. Maba totulanga tsudi yikitoko bu mavikulu ku mbazu. Ayi mile† 2.11 mile : mafuta ma tsudi yikitoko..
12 Nzambi bu kaba lubula mu ndozi ti babika vutukila kuidi Elode, mu nzila yinkaka bavutukila ku tsi awu.
Batinisa Yesu ku Ezipite
13 Buna bayenda, mbasi yimosi yi Pfumu yimonikina Zozefi mu ndozi, yinkamba :
—Telama wubonga muana ayi ngudi andi, tinina ku Ezipiti. Vuanda kuna nate ndiela kukamba ti thangu yivutukila yifueni, bila Ntinu Elode wela tomba vonda muana !
14 Muna builu beni Zozefi wutelama, wubonga muana ayi ngudi andi, wuyenda tinina ku Ezipiti. 15 Wukala kuna nate Ntinu Elode kafua mu diambu di dedikisa mambu mayoluka Pfumu mu munu wu mbikudi, bu kabikula ti : Nditela muanꞌama katotuka ku Ezipiti !
16 Elode bu kazaba banduenga bamvuna, wufuema ngolo. Diawu katumina bavonda, ku Betelemi ayi mu mala mafikamini, bana boso bababakala badi mimvu miodi nate kuna tsi, landila thangu yiba nkamba kuidi batu beti longuka zimbuetete.
17 Mu nzila yoyo mambu mabikula mbikudi Yelemi madedakana :
18 Mbembo yiwakana ku Lama
bidilu ayi maniongo mawombo ;
Lakheli wulembo didi bana bandi ;
kakadi zola bombo
bila bana beni basiedi ko.
19 Elode bu kafua, mbasi yi Pfumu yimonikina Zozefi‡ 2.19 Minkanda minkaka misonika Yosefi va buangu ki Zozefi. mu ndozi ku Ezipiti, 20 ayi yinkamba :
—Telama wubonga muana ayi ngudi andi, vutuka yawu ku Iseli, bila batu bobo babedi tombanga mu vonda muana bafuidi.
21 Zozefi wutelama, wubonga muana ayi ngudi andi, wuvutuka ku Iseli. 22 Vayi Zozefi, bu kawa ti Alikelawusi muana Elode, wuyadila Yuda va buangu ki dise diandi Elode, wumona tsisi mu buela vutuka kuna. Bosi mu ndozi yinkaka Nzambi wunlubula ti kenda mu zunga ki Ngalili. 23 Buna wuvuanda mu divula diba tedolongo Nazaleti muingi mambu ma mimbikudi madedakana : bela kuntedilanga muisi Nazaleti.