1 A Yave, ntinu weti yangalala mu zingolo ziaku

ayi tala phila khini andi yididi yinene mu ndungunu yoyi weti vana.

2 Ngeyo wumvana bima bioso bitomba ntimꞌandi.

Ayi wusia kunyimina ko zindombolo ziozi kalomba mu bididi biandi.

3 Ngeyo wuntambula va kimosi

ayi lusakumunu lu luvalu lu ngolo.

Ngeyo wutula budu ki nolo yi vedila

va mbata ntuꞌandi.

4 Niandi wulomba luzingu kuidi ngeyo ayi wumvana luawu,

luzingu lu mula mu zithangu zioso

ayi lu kalumani.

5 Nkemboꞌandi widi wunneni mu diambu di ndungunu weti vana.

Ngeyo wumvuika kiezila

ayi nzitusu.

6 Bukiedika, ngeyo wumvana lusakumunu lu kalumani ;

wunkitula mutu wu yangadala mu diambu di khini yidi va meso maku

7 Bila Ntinu wuntulanga diana diandi mu Yave ;

Ayi mu diambu di luzolo lu ngolo Nzambi yizangama,

kalendi bulangana ko.

8 Koko kuaku kuela buila bambeni ziaku zioso.

Koko kuaku ku lubakala kuela buila

bobo beti ku lenda.

9 Wela kuba kitula banga mfulu makala ma mbazu,

mu thangu yoyi wela kukimonikisa.

Yave wela kuba sikisa mu nganzi andi.

Ayi mbazu yela kuba zinisa.

10 Wela bunga nkunꞌawu va ntoto

ayi bana bawu va khatitsika yi bana ba batu.

11 Ka diambu ko balenda kubika mambimbi mu diambu diaku

ayi yindula zikhanu zimbimbi, balendi nunga ko.

12 Bila ngeyo wela kuba tinisa

bu wela kuba basula mu mbasꞌaku.

13 A Yave, yayusu kuaku mu zingolo ziaku.

Tuela yimbidila ayi zitisa lulendo luaku.