1 Ndiyamikina kuidi Nzambi mu diambu di lusadusu

ndiyamikina kuidi Nzambi mu kunguila.

2 Thangu ndiba mu ziphasi, nditomba Yave ;

va builu ndinonuna mioko miama

mu kambu vonga ;

ayi muelꞌama wumanga bombo.

3 Ndietebukila moyo, a Nzambi, ayi ndikunga ;

ndiyindula mu tsi ntima ayi pheve ama yivonga ngolo.

4 Wekeba meso mama ma bika zibama,

ndiba diaka mu phasi mu tuba.

5 Ndiyindula bilumbu bivioka, mimvu mi thama.

6 Ndieti tebukila minkunga miama moyo va builu,

Ntima ama uyindula ku tsi ntima

ayi pheve ama yikiyuvula :

7 Pfumu wela tumbu loza kuandi mvimba e ?

Kalendi buela monisa nlemvo andi ko e ?

8 Luzolo luandi lungolo lusukidi kuandi mvimba e ?

Zitsila ziandi mu zithangu zioso

zikitukidi zi phamba e ?

9 Nzambi wuzimbikini kuandi buela monisa nlemvo e ?

Wuyimini kiadi kiandi mu diambu di nganzi e ?

10 Buna ndiyindula “mu diambu diadi ndiela singimina :

mimvu mi koko ku lubakala ku Nzambi yizangama.”

11 Ndiela tebukila moyo mavanga ma Yave,

bukiedika ndiela tebukila moyo

bikumu biaku bi thama.

12 Ndiela yindulanga mu tsi ntima bisalu biaku bioso ;

ayi ndiela banzilanga mavanga maku moso ma lulendo.

13 Zinzila ziaku, a Nzambi, zidi zinlongo ;

nzambi mbi widi wunneni banga Nzambi eto e ?

14 Ngeyo widi Nzambi yimvanganga bikumu ;

Ngeyo weti monisa lulendo luaku muidi batu.

15 Mu koko kuaku ku lulendo wukuidila batu baku,

nkuna wu Yakobi ayi wu Zozefi.

16 Minlangu mimmona, ngeyo a Nzambi !

Minlangu mimona ngeyo, ayi mikotadala

zitsina zi minlangu zi nikuka.

17 Matuti madukula minlangu ;

diyilu diduma mu nzazi

madionga maku matotuka ku ntuala ayi ku mbusa.

18 Zinzazi ziaku ziwakana mu kimbongila ;

zitsiemo zikienzula ntoto ;

ntoto wunikuka ayi wutita.

19 Nsolo aku wuviokila va khatitsika mbu,

nzilꞌaku mu minlangu midi nguma,

muna zithambi ziaku zisia monika ko.

20 Wudiatisa batu baku banga nkangu wu mamemi,

mu koko ku Moyize ayi Aloni.