MINKUNGA.
53.
Nkunga Davidi kuidi pfumu minyimbidi ; kayimbidila mu flute. Nkua buvulu wuntubanga mu ntimꞌandi : “kuisiko Nzambi.” Bakibivisidi, zinzila ziawu zidi zimbimbi ; kuisiko mutu wumvanganga mamboti. 
Nzambi, wulembo tadi tona ku Diyilu bana ba batu mu diambu di tala kani valenda ba batu balenda sudika ; bobo bantomba Nzambi. 
Batu boso bamana zimbala, bamana kibivisa va kimosi. Kuisiko kadi wumosi wumvanganga mamboti, kadi kuandi wumosi. 
Bobo bamvanganga mambimbi, basudikanga ko e ? Bawu balembo dia batu bama banga bu beti dila dipha ; ayi batelanga Nzambi ko. 
Kuna batitila mu diambu di tsisi va buangu ki kondolo bila kimonina tsisi ; Nzambi wukosikisa mimvesi mi batu bobo banuanisa ; ngeyo wuba fuisa tsoni bila Nzambi wuba lenza. 
A, enati phulusu yi Iseli yitotukila ku Sioni ! Mu thangu Nzambi kela vutula kiuka ki batu bandi ; bika Yakobi kamona khini ayi Iseli kayangalala.