8
Iesu keu nahie dubue kosive baluga.
1 Nahi ehue louale hoto ke ihuike ko. Seleveta Iesu keu nahie dubue kosive baluga holinu. Iale Dilavau otogoe telonamo ugulamoi ata nibievemale keve Iesuu adave inuteveatae ugulamonu. 2 Keu otogoe Dilavau umale keve nahie dubue kosive baluga holisi lovive vama. Keu vatae dubue kosive nahate vaholisito Dilavau avuho loui mamoale lovi ke vama.
3 Diue ataeau dubue kosive baluga tabagevege abu Dilava hoesehavoliho ovo havei mahoevema. Isito nahie dubue kosive baluga Iesu keu nahie toela ibinaho au ebika mai Dilava omisi hatinu. 4 Keu vatae ui hatioholivatebe dubue kosive holioholinu. Kosealemo Diue dubue kosiveau sohu abu menaka ehovai ovo havei mahoma. 5 Diue dubue kosive kebia vaveveu otogoe lovi ke munana nahate. Katealemoike Moseseu subuta dubu houho vage Dilavau haivui avoe, “Neniai di tanae onobenobe bahata a haivuale ke nahate hounela.” 6 Iale Iesuu otogoe dubue kosive baluga lovi vale keu Diue dubue kosive baluga kebia lovi evihanu. Ige Iesu menaka mamoale menakave keu menakae mami ke evihanu. Kosealemo Iesu hotoe dua loui mamoale kemo nahiabuna Dilavaluvuta igaetolahai ue dua vai.
7 Subuta menaka keu dua vatege Iesuu menaka mole doga tota mamoholinu. 8 Isito Dilavau subuta atae vaveve elehage vaveveabeu inutolotoloholinu. Ige Dilavau Bukae Hotomo loui avoe,
“Gabie vani molena lohoge dana Diue ata kebiaho menaka mole doga mamoi.
9 Menaka keu bae di subuta buluveabeho menaka mamoale ke nahate valivebene.
Subuta vani kemo di buluveabe holoevege abu Egubito halevai tilu.
Ige di abuho menakage abu kemo abu uvu mai mavoi ehovaholilu.
Katealemoike di kebia halevenu.
10 Isito gabie vani molena lohoge dana Iselala ataho menakae doga koseale mamoi.
Dana uvuiabemo di hoto mamoge abuna ke huhulahai ehovai.
Ige dana Dilavaeabe holige abuna di ata holisi.
11 Vani kemo atabeu bae au vavamo umale isi au haoka kebiaho kosive hilokaveve hoto loui haivelivebene.
Kosealemo vani kemo esebulu isi kosi keabuna bahata di hilokai.
12 Ige dana abuho uvuai vaveveabe toela ulihai. Isime bae tota toelaeabe ke huhualivebene.”
13 Dilavau menakae dogae hoto louale keu menakae mami ke lovo masege menakae mami keu uoholinu.