3
Ata babatisogevemale Dioniu loviamale deiada
(Matiu 3.1-12; Maka 1.1-8; Dioni 1.19-28)
1 Vani moleu lohoge Loma kosive baluga Taibeliosi keu vagana vivtini (15) ke uvumo vatae kosive baluga holinu. Isege Botiasi Bailoti keu Diudia vatae kosive holinu. Isege Elodi keu Galili vatae kosive. Isege hohove Bilibi keu Itulia isi Talekonaita vata kebia nibievema. Isege Lisaniasi keu Abilini vata ke kosive. 2 Isege vani kemo dubu nalimale kosive abuitaeau ua. Iviabeike Anasi isi Kaiabasi. Kosive katealeau usege vani kemo Dilavau Sekalaia mo Dioni botoe umale ke namihanu. 3 Ke namihage au tialeu e mole Diodani ke vavae matama igaegaela ata haivei loui avoe, “La vaveve toela ke halevai hoidevei babatisolahave. Ige Dilavana la vaveve toela ke ulihage auna uoholisi.” 4 Iale Dioni vaveve keike beloveta mole Aisaiau subuta loui hisaliai avoe,
“Ata molena bae ataeau uvesiteve hoai kosea,
‘Kosiveho humaha ke inuta loive.
Isi au tiveve humaha ke inuta vave.
5 Loho ke omisi vealuvive.
Isi hevaha ke lovoi omisi hevaluvive.
Isi ke hoesehavoge au inutolotoloai.
Humahau keukakeukage ke inutolotolohavove.
Isi humahae toela keta hoesehavove.
6 Katealemo ata bahataeabuna Dilavau toelamo ata maleveveve ke elehai.’ ”
7 Ata moagaeau Dionie lohoi isiviale au babatisogevei. Isito Dioniu namigevei avoe, “La keau ute nahatea. Laeau isiviholilu Dilava itumuu lae loholiho. Isito la hoidevei Dilava ehovaholilu. Katealemoike Dilava itumuu laemo lohoma. 8 Iale vasohuta la vaveve toela halevai vaveve dua vave. Isi kemo bae babatisolahave. Isi lainaho huhulahai kosea, ‘Noeau Ebalahamu valada noeabuliko. Iale Dilava itumu keu bae noemo loholivebene.’ Di la namigevege evive. Dilavana isivianiege mune kobiamo Ebalahamu valada degomole vaevege abuna la lovomo ui. 9 Soeu idie umukamo heiliho hemei ua. Iale idi oletena baioholige auna idi ke heisi mai venemo mihatuge auna lahai.”
10 Kateai louge ataeau loui avoe, “Iale noeabuna vadeai.” 11 Ige Dioniu namigevei avoe, “La oleuoleu ogo abuiabuialiege mole mai ogoholiale ke omive. Isime la oleu lovi balugau avuemo uge degomole malei lovioholiale kebia oveve.” 12 Kateige takesi moni malemale ataeau Dioniu babatisogeveho avue loholu. Isi namihai avoe, “No haivemale ata, noeabuna vadeai.” 13 Ige au loui avoe, “Lainaho vavolo nahate valive. Gamaniu takesi loumale moni ke unaha maleve.” 14 Kateige tuvalie ataeau Dioni namihai loui avoe, “Isege noeabuna vadeai.” Ige keu loui avoe, “Lainaho bae ata havei moniabe malelive. Isi lainaho ata molemo loboe hoto loui moniabe malelive. Lainaho la ibina ke elehai kabebilahalive.”
15 Kateige vani kemo ata bahataeau Dioni hoto maime loui avoe, “Mesoho ata kou nahie ata tedaeveve Kelisoike ko.” Kateai louime ke kaovai molehi hotohotolahama. 16 Ige Dioniu kebia bahata namigevei loui avoe, “Dana emo la babatisogevei. Isito ata mole baluga di evihale keu aike lohoma. Di baluga holioholialemo tamakave iamoveve keu daemo anekianu. Eu kosive. Isege dau valave. Iale auna Munana Tumuteta veneta la babatisogevei. 17 Iale ata kena lohoniege au keilota laisue i bisi kitoai hatuge momoluve abuna moleve keiolahasege ive abuna moleve keiolahai. Ige auna laisue i malei au valahumo otoveito momoluve ke malei veneu hodovavesite kemo mahoevei.”
18 Dioniu hotoe dua moaga kateale loui ata haivenu. 19 Isi gamanie kosive Elodiho hoto tolote lounu. Kosealemoike Elodiu au hohoe mahina Elodiasi ke etulei melamenu. Isi vaveve toela degomoleta vaevenu. 20 Vaveve toela moaga vaeveito ke golomo Dioni mai dibulae hanavonu.
Iesuu babatisoale deiada
(Matiu 3.13-17; Maka 1.9-11)
21 Au mai dibulae hanavoholisege Dioniu ata degomole babatisogevenu. Isi Iesuta babatisohavonu. Ige Iesu hovelahai lamisi guliguliasege otogou dikolahanu. 22 Ige Munana Tumuteu imutava ke nahate holisi dobai lohoaleu avuemo ua. Isege hoto moleu otogomo dobai lohoaleu loui avoe, “Au di uvue mo seleve. Iale di a vahaeho va baluganu.”
Iesu valadae deiada
(Matiu 1.1-17)
23 Iesu babatisomale vani kela vaganaveu teti (30). Ige ataeau huhulahai avoe, “Iesu keu Dioseba mo.” Isito ke mama seleveike Dilava.
Ige Dioseba mamaike Heli.
24 Ige Heli mamaike Matati.
Ige Matati mamaike Livai.
Ige Livai mamaike Meliki.
Ige Meliki mamaike Dianai.
Ige Dianai mamaike Dioseba.
25 Ige Dioseba mamaike Matataiasi.
Ige Matataiasi mamaike Emosi.
Ige Emosi mamaike Nahumi.
Ige Nahumi mamaike Esili.
Ige Esili mamaike Nagai.
26 Ige Nagai mamaike Meati.
Ige Meati mamaike Matataiasi.
Ige Matataiasi mamaike Semeni.
Ige Semeni mamaike Dioseki.
Ige Dioseki mamaike Dioda.
27 Ige Dioda mamaike Dioanani.
Ige Dioanani mamaike Leisa.
Ige Leisa mamaike Selubabeli.
Ige Selubabeli mamaike Siatieli.
Ige Siatieli mamaike Neli.
28 Ige Neli mamaike Meliki.
Ige Meliki mamaike Adi.
Ige Adi mamaike Kosami.
Ige Kosami mamaike Emadami.
Ige Emadami mamaike Eli.
29 Ige Eli mamaike Diosua.
Ige Diosua mamaike Eliesa.
Ige Eliesa mamaike Diolimi.
Ige Diolimi mamaike Matati.
Ige Matati mamaike Livai.
30 Ige Livai mamaike Simioni.
Ige Simioni mamaike Diuda.
Ige Diuda mamaike Dioseba.
Ige Dioseba mamaike Dionami.
Ige Dionami mamaike Eliakimi.
31 Ige Eliakimi mamaike Melea.
Ige Melea mamaike Mena.
Ige Mena mamaike Matata.
Ige Matata mamaike Natani.
Ige Natani mamaike Deividi.
32 Ige Deividi mamaike Diesi.
Ige Diesi mamaike Obedi.
Ige Obedi mamaike Boasi.
Ige Boasi mamaike Salemoni.
Ige Salemoni mamaike Nasoni.
33 Ige Nasoni mamaike Aminadabu.
Ige Aminadabu mamaike Alamu.
Ige Alamu mamaike Heseloni.
Ige Heseloni mamaike Belesi.
Ige Belesi mamaike Diuda.
34 Ige Diuda mamaike Diekobo.
Ige Diekobo mamaike Aisiki.
Ige Aisiki mamaike Ebalahamu.
Ige Ebalahamu mamaike Tela.
Ige Tela mamaike Nahoa.
35 Ige Nahoa mamaike Seluki.
Ige Seluki mamaike Leu.
Ige Leu mamaike Beleki.
Ige Beleki mamaike Ebeli.
Ige Ebeli mamaike Sala.
36 Ige Sala mamaike Keinani.
Ige Keinani mamaike Avasadi.
Ige Avasadi mamaike Semu.
Ige Semu mamaike Noa.
Ige Noa mamaike Lameki.
37 Ige Lameki mamaike Metusala.
Ige Metusala mamaike Inoka.
Ige Inoka mamaike Dieleti.
Ige Dieleti mamaike Mahalaleli.
Ige Mahalaleli mamaike Keinani.
38 Ige Keinani mamaike Enosi.
Ige Enosi mamaike Seti.
Ige Seti mamaike Adamu.
Ige Adamu mamaike Dilava.