1 Kote givu! God Afa da dubo bari namondekena mo, tomanako bekári! Nunda dubo bari namondekena ijuguse, namonde nunda sasingudae bari sisira. Sisira ava, beká siroretiri namonde nunda sasingu edo irera. Evetu genembo fisi da uju use irera, ne God a nunda irari ava jo kasama ae irera. Aindae sedo, ne namonde a namondeda irari barago, jo kasama ae eraera. 2 Nanda nano namendi, namonde oroko God da sasingu edo irera. Avata sifo gombuda, namonde kau mavega arera ava, namonde jo kasama e gogoghombae irera. Avata dabako kasama erera amo, eviri. Keriso jovereghe furarira ainda sifoda, nu kau mavega, ava fuge gido, namonde kau numongo ava edo irarera. 3 Avori, namonde numongo arera ava, mave kasama use a tumonduse irarira amo, kau Keriso eraira aminga ava use, nu ari ekoko da emboro isasambu imboe use darigarira.

4 Mave ari eko eni arira amo, nu God da Agho Dari ava bejarira. Ainda susu mo: ari ekoko rejo ava irira, ainda kau ava, Agho Dariimi ijugeraira. 5 Ne kasama ereva, Keriso evetu genembo da ari ekoko seghe fugari dae sedo fusira. Numokena ari eko eni tefori. 6 Ava sedo, evetu genembo mave Keriso de dabade tatarera amo, ne jo ari ekoko use irae arera. O mave ari ekoko use irarera amo, ne Keriso jo gae irera, a nu jo kasama ae irera.

7 Nanda sasingu, evetu genembo mendeni da gungubo geka ava, erá tumondeove dae sise resena. Mave ari eveva use irarira amo, nu kau Keriso da kaugori. 8 O mave ari ekoko use irarira amo, nu Satan da tofo edo irise, amingarira. Ainda beká mo: Satan nu tuturoda ghedo ari ekoko udo refira. Aindae sedo God da Mandi fusira. Amo, Satan da ari rea eraira a rejo etiri sirorusira ava, dari bejare dae sedo, fusira.

9 Evetu genembo mave God da sasingu edo irera amo, ne jo ari ekoko use irae arera. Ainda beká mo: God nunda jebuga a nunda irari ava, nunda sasingu da dubo jokáda fitiri sembiri, nu nenda afa edo irira. Ava sedo, evetu genembo mave God da sasingu edo irera amo, ne jo ari ekoko use irari da kaugo iraeri. 10 God da sasingu mavejori, kotugo Satan da sasingu mavejori, ava nange kasama areri? Amo kau evavagori! Evetu genembo mave ari ekoko use irarera, o nenda nano namendi imboe use irarera amo, ne jo God da sasingu iraeri.

11 Geka tuturoda setero nininguseva amo, eviri. Namonde minonde minonde dubo ruruse irarera. 12 Kau Cain usira aminga ava, namonde jo ae arera. Nu Satan da tofo edo irise, nunda namendi detiri ambududurusira. Amingusira da beká mo: nu ari ekoko avanembo edo ghusira. O nunda namendi mo, ari eveva avanembo edo ghusira. 13 Ava sedo, nanda nano namendi, evetu genembo fisi da uju ava use irera aimi eredo, kau Cain usira aminga ava use, ne imboe arera amo erá buneove!

14 Namonde ambarida ghe fera jebugakena sembudo irera, ava kasama erera. Namonde ava kasama erera da beká mo: namonde nano namendi dubo ruruse irera. O mave nunda nano namendi jo dubo bae irira amo, nu ambari jokáda irira. 15 Ai resira amo: mave nunda namendi imboe use irarira amo, kau nunda namendi dari ambaetira, ainda kaugo ava kotise iraetira. A namonde kasama erera: evetu genembo mave kokomana daoro ambarera amo, ne jebuga evovodae irari ava jo bae arera. 16 Keriso namondedae sedo rea usira ava kotise, namonde dubo bari da aito ava kasama arera. Keriso emingusira. Nu namondedae sedo fira ambududurusira. Ava sedo, namonde kau daba ava use, namondeda nano namendi sonembari dae sedo, ambaeteri. 17 O makasi embo eni baimaraghae irari gido, nunda namendi eni susu iti fafode aimi jo sonembae irise, “Na God dubo ererurena,” saetira amo, nu gungubo saeti. Ai resira amo: nu God da uju ava use nunda namendi sonembaetira, avata nu jo sonembaeri. 18 Nanda sasingu, namonde tofo tofo dubo bari da emboro mo, jo geka sari vanembo iraeri. Namondekena dubo bari iraetira amo, namonde evetu genembo sonembuse saramana ururoro, namondeda dubo bari ava isagha ari evetu genembo gido ghaeteri.

19 Avori, namonde God da Geka beká ava tumonduse, jebuga budo irera ava, nange kasama areri? A namonde nange kasama use, dubo jama edo God dae jo oju ae areri? Amo, namonde emingarera. 20 Namonde dubo jokái, “Arie, na dara eteni!” aminge itatamaetera amo, namonde oju use vujegaeteri. Ainda beká mo: namondeda dubo joká ainda kasama mo, kitakori. O God da kasama mo, teria bekári. Ava sedo, dara rea usera, nu anakora kasama edo irira. 21 O namondeda dubo jokáda, ari eko eni jo itatamae arera amo, namonde fakina edo, God da dombuda fete gogoghombarera. 22 Amingedo, namonde rejodae benunu sarera amo, mutari namonde barera. Mutari barera da beká mo: nunda geka a nunda uju ava urureoro gido, nu ivuga eraira. 23 A God rea uju eraira amo, eviri. Namonde, nunda Mandi Iesu Keriso rea aoro dae sisira ava use, nunda javo fakinaghae ava tumonduse, tofo tofo dubo ruruse irarera. God nu, namonde amingaoro dae uju eraira. 24 Mave God da geka a uju ava use irarira amo, nu God ghae dabade tatarira, a God numokena irarira. Kotugo, God namondekena irira ava, nange kasama areri? Amo, eminge kasama arera. Nunda Asisi namondekena mutiri rurusera aindae, namonde kasama erera, God namondekena irira.