32
Namonde Da Ari Ekoko God Kena Vujegedo, Kote Doyare Dae Saore!
1 Evetu genembo maveda ari ekoko Bajari kote doyeraira amo,
ne ivuga beká ava arera.
Mave dara aoro gido, Bajari kote dotutuse mino mutari jo sae arira amo,
nembarago dubo jama use ivuga arera.
2 Genembo maveda ari Bajari jo ijujuse,
nunda dara jo tava ae arira amo,
nu ivuga arira.
Mave nunda komana jo itako derae eraira amo, nu ivuga arira.
3 Avata namo, nanda ari ekoko jo vujegae irise,
na isonga numboru sorara janjagughae use iriana, tamo roroghotetiri sifo dadabusira.
4 Bajari, sifo a tumba evia inono, nine na deaso nanda fakina dadabe gogoghombedo ghusira.
Kau borija da sifo aminda, mungo voseari iji totoi aveari kaingheraira aminga ava, nanda fakina dadabusira.
5 Dadabetiri, nanda ari ekoko nimokena vujeguseni.
Nanda ari sembae ava, jo jungae useni.
Nanda dubo jovereghetiri, nanda ari ekoko nimokena vujegeteno ningido,
ni nanda ari ekoko isasambu kote dotutusesi.
6 Ava sedo, kau nimokena banungusena aminga ava,
ninda evetu genembo tumondari kakato dara jokáda fetirise itatamarera amo,
nimokena banungaeteri.
Amingarera amo, dara kau usegha gisi aminga ava foa nemokena bejarira amo,
ne jo derari itatamae arera.
7 Ni nanda tere jungari vasa fakaragori.
Ni na sonembeaso, dara da mema eniko jo itatamae eraena.
Ni na gagara easo, na nimokena ambo sose feteraena ava sedo,
na beka fainghedo, ninda sonemba ava kotise, yaru divuraena.
8 Bajari eminge resira, “Ni reda yaetesa ainda emboro ava nane ijugaono garesa.
Na ninda dengoro induduse, emboro eveva ijugarena.
9 Erá gogore eose! Hosi (horse) o sino fuka ‘mule’ seraera,
ainda kiki mo eviri: nu kotae kotae eraira.
Ava sedo, ninda uju ava are dae sedo, auri nunda bekada dighido fakinaghae jumbaso,
mema itatamuse, ninda uju aminda yarira. Erá hosi (horse) da gogorego eose!”
10 Ari ekoko embo nenda dara da bouvu ava fumbarera, avata evetu genembo mave Bajari tumonderaera amo,
nunda dubo bari evovodae irira aimi, ne gagara ari evevada irarera.
11 Ne mave ari eveva a dambu eraeva amo, ne riria use ivuga evu!
Bajari nu rea nendae usera ava kotise, ivuga evu!
Ne mave nunda geka ningiraeva amo, ne ivuga use, koko sevu!