90
1 Arie, Bajari, ni evovodae namanenda irari vasa, namanenda nati ava, nine edo iresa.
2 Ni doriri a enda jo aso sirorae iriri ainda gitida, ni evovodae iriasi.
A kotugo, ni iresa, a evovodae iraresa.
3 Ni seaso evetu genembo jovereghedo sekago fonja jineraera.
4 Ghaeko 1,000 tegaresa amo, nimokena mo, kau sifo dabako da kaugori.
Ghaeko a sifo amo, inono sife irara jiriri dadabumuta, aminga ava dadabarira.
O kau tumba jokáda sifo goroto tufako ya dadaberaira, aminga ava dadabarira.
5-6 Kau usegha o gisi foa, roera isambu bu yeari dadaberaira aminga ava,
ni namane beoso dadaberaera, amo kau aturu da kaugori.
Namane mo, kau vive sifoghae vitido vuji gatedo,
kotugo tumba jireari gharasa edo aviraira aminga ava eraera.
7 Ninda janje ekoimi namane deaso sirivo eraera.
Ninda janje eko teria beká aindae, namane oju beká ava use, ungo ata dadadagheraera.
8 Ni namanenda ari ekoko ninda dombuda fitiraesa.
Namanenda ari ekoko ufena eraera ava, ninda usasada fiti gosuse irá gheraesa.
9 Ni janje eko eari seaso namane amburaera, jo ghousa irá ghae eraera.
Namanenda jebuga, kau beka roboghoi sirureoro ya dadaberaira aminga ava eraira.
10 Ghaeko 70 edo irarera amo, inonori, namanenda boandari.
O namane fakina beká ava arera amo, ghaeko 80 edo iria ambarera.
Avata ainda jokáda, dara a mema avanembo itatamuse iria gheraera.
A kotugo, namane totoi namanenda jebuga dodo ambeoro dadaberaira.
11 Mave eniimi, ninda janje eko ainda bouvu isambu jo itatamae usira!
Mave eniimi, oju ninda janje eko teria beká bu foa gheraira ava, jo itatame gogoghombae eraira!
12 Namanenda irari enda eminda, sifo tufako irarera ava ijugaso, namane gi kasama use, dubo kote gogoghombarera.
13 Arie, Bajari, ninda janje eko namanekena nanjigo dadabari?
Bajari, jovereghe fu, namane ninda saramana kakato, namanekena joka aetesi!
14 Sifo ava inono, ninda dubo bari averegaso, namanenda dubo joká bedo beká are!
Amingaresa amo, namane yaru didivuse, namanenda jebuga jokáda sifo ghousa ivuga use irarera.
15 Giti, ni namanekena dubo mema muteaso, namane ghaeko ghousa dubo mema tafuse irá ghedo ghuseri.
Ava sedo, kau giti dubo mema begogo futusesa aminga ava, oroko dubo jama a ivuga begogo mutaso itatamuse irore!
16 Sonembaso, namane ninda saramana kakato ninda ari fakina ava gaore!
A kotugo sonembaso, namanenda imemesiri nembarago ninda fakina duroghae ava gaore!
17 Bajari namanenda God, sonembaso ninda esimbugari namanekena irare!
Namane rea ari dae erekotera ava, sonembururaso inononda aoro beká sirorare!