147
God Fakina Isambu Da Tofo, Aindae Sakai Saore!
1 Bajari dae sakai saore! Ainda susu mo,
namondeda God ava yaruimi
sakai sise sari mo, evevagori!
2 Bajari nune Jerusalem gitofuimi bejisera ava, ari fatonga arira.
Israel embo gitofui bambu isera ava,
sekago bu jovereghe refira.
3 Ghamo memai bunedo irera, ainda
gambisi ava nune doghedo seari jebugeraera.
4 Nu damana nanjogo uju usira ava, setiri siroretiri, isambu nenda javo javo
nune jijighusira.
5 Namondeda Bajari mo teriago a fakinago bekári.
Nunda dubo kotari jo maveda tega iraeri.
6 Tumo darido irari embo nune soredo jighiari ereraera.
O eko embo mo, nune endada kambata eraera.
7 Nenda bekaimi Bajari dae aiyakoe sise yaru sevu! Gita* Afige, geka eni gita o uka dae gefusera, tuturo 32:2 duruda tege, garesa! doruse, nundae yaru gatevu!
8 Nune forogaimi utu doghedo simbugeari,
borija endada dido eari,
kunikada eke batuno use vivitigeraira.
9 Bao oka da bayau nune muturaira.
A ogha mamandi bayaudae kori sirurureoro nune unduraira.
10 Hosi da tutu ava numokena jo rejo eni iraeri,
kotugo isoro genembo da fakina aindae,
nu jo kotae eraira.
11 O mave nundae igheghi use,
nu kakara eraera aikena, ivuga eraira.
Kau daba aminga ava, mave nunda dubo bari a kavevera tumonduse irera, nendae ivuga eraira.
12 Arie! Jerusalem embo, Bajari dae sakai sevu!
Saion† Saion dae gefusera, tuturo 2:6 duruda tege, garesa! aminda ireva, nenda God dae sakai sevu!
13 Ai resira amo, nenda furuda guru mane ava isambu nune kaifa urureari eveva irá gheraeva.
Nenda natofo aminda isambu, nune esimbugeraira.
14 Nenda reighida tano nune kaifa urureari, gitofu terari manamana use irá gheraera.
Nenda farava vuji garigarigo ava nune futurureari, inonoda budo gheraeva.
15 Nune endada nunda uju ava sirorare dae seari
nunda uju seraira ava, totoi nembo siroreraira.
16 Aisi (ice) yaurago ava nune muteari borija dirarigo use vose enda afuregeraira.
Sifo daba daba aisi muteari, mungaghae vose avegha fonja raraghari ghedo
enda afurugeraira.
17 Nu borija dombu eni aisi babai yaurago ava averegeari jeviri da udumu aminga ava vose faseraira.
Yaura nune nanjigo muturaira, mave ainda jokáda fetari jo inono iraeri.
18 Avata nune seari aisi amo tiveraira. Yaura vevera sumbare dae seari tivedo uvu sumburaira.
19 Nunda geka nunda natofo Jacob da sasingukena mutudo gheraira.
Nunda ijuga kotugo Agho Dari ghaseari nunda natofo Israel embo buraera.
20 Nu oro mendenidae jo amingaeri, nunda Agho Dari ne bunariri.
Bajari dae sakai saore!