35
God El Kalyei Facl Edom
1 LEUM GOD El kaskas nu sik ac fahk, 35:1–15; Isa 34:5–17; 63:1–6; Jer 49:7–22; Ezk 25:12–14; Amo 1:11–12; Oba 1–14; Mal 1:2–5 2 “Kom, mwet sukawil moul la, fahkak kas in palu lain facl Edom. 3 Fahk nu sin mwet we ma nga, LEUM GOD Fulatlana, fahk inge:
“Fineol in acn Edom, nga lain kom!
Nga ac fah oru tuh kom in sie acn sikiyukla ac mwesisla.
4 Nga fah oru tuh siti nukewa sum in arulana musalla,
Ac facl sum in wanginla ma oan fac.
Na kom fah etu lah nga pa LEUM GOD.
5 “Kom nuna mwet lokoalok lun Israel oemeet me, ac kom fuhlelana in anwuki mwet lal ke pacl ongoiya nu sel, ke pacl in kaiyuk safla lal ke ma koluk lal. 6 Ke ma inge, oana ke nga, LEUM GOD Fulatlana, pa God moul, saflaiyom pa misa, ac kom tia ku in kaingkunla. Oasr mwata nu sum ke akmas, na akmas ac fah ukwe kom yen nukewa. 7 Nga ac oru tuh infulan eol Edom in sikiyukla, ac nga fah uniya mwet nukewa su fahsryak nu we. 8 Nga ac fah afunla eol uh ke monin mwet misa, ac manolos su anwuki ke mweun ac fah afunla inging ac infahlfal nukewa. 9 Nga ac fah oru tuh kom in sie acn sikiyukla nwe tok, ac wangin mwet ac sifil muta in siti sum uh. Na kom fah etu lah nga pa LEUM GOD.
10 “Kom fahk mu mutunfacl Judah ac Israel ma lom wi acn nukewa lalos, ac kom fah eisla facl luo inge, finne nga pa LEUM GOD lalos. 11 Ke sripa inge, oana ke nga LEUM GOD Fulatlana pa God moul, nga ac fah folokin nu sum mwatan kasrkusrak ac lemta ac srunga lom nu sin mwet luk. Na elos ac etu lah nga kalyei kom ke ma kom oru nu selos. 12 Na kom fah etu lah nga, LEUM GOD, lohng kusen angyang lom ke kom fahk mu fineol lun Israel sikiyukla, ac kom ac fah som kunausla. 13 Nga lohng pusra enum nukewa ma kom fahk lainyu ah.”
14 Na LEUM GOD Fulatlana El fahk, “Nga ac fah oru kom in arulana sikiyukla, na faclu nufon ac engankin musalla lom uh, 15 oana ke kom tuh engankin musalla lun Israel, su ma luk. Fineol lun Seir — aok acn Edom nufon — ac fah arulana sikiyukla. Na mwet nukewa fah etu lah nga pa LEUM GOD.”