3
Sie Pre Lal Habakkuk
1 Pre se inge ma lal Habakkuk, mwet palu:
2 O LEUM GOD, nga lohng tari ke pungom,
Ac nga arulana fwefela ke orekma lom.
Sifilpa oru in pacl lasr uh
Orekma usrnguk ma kom tuh oru meet ah.
Pakoten nu sesr, finne pacl kom kasrkusrak.
3 God El ac sifilpa tuku Edom me;
God mutal El tuku liki eol srisrik lun Paran,
Wolana lal afunla inkusrao,
Ac faclu sessesla ke kaksakinyal.
4 El tuku wi kalmen sarom;
Kalem sarmelik liki inpaol,
Yen ku lal wikla we.
5 El supu mas upa uh in fahsr meet lukel,
Ac sapkin tuh misa in fahsr tokol.
6 Ke pacl se El tui, faclu kusrusr;
Ke ngetang lal, mutunfacl uh rarrar.
Fineol ma nuna oan oemeet me muliplipi,
Ac eol srisrik su ac oan nwe tok tili,
Aok eol srisrik yen El fahsr we in pacl oemeet ah.
7 Nga liye ke mwet Cushan elos sangeng,
Ac ke mwet Midian elos rarrar.
8 LEUM GOD, ya infacl uh pa tuh oru kom kasrkusrakak ah?
Ya meoa uh pa tuh oru kom foloyak ah?
Kom kasrusr fin pukunyeng uh;
Pukunyeng in paka uh pa chariot nutum
Ke kom tuh use kutangla nu sin mwet lom.
9 Kom akola in orekmakin mwe pisr nutum,
Akola in pisrik sukan pisr nutum.
Sarom lom foklalik faclu.
10 Pacl se ke eol uh tuh liye kom, elos rarrar;
Kof uh kahkla inkusrao me.
Kof ye faclu ngirngir,
Ac noa kaclos pisryak nwe lucng.
11 Ke usren mui lun pisr nutum
Ac saromla lun osra saromrom nutum
Faht uh ac malem uh tui, tia mukuikui.
12 Kom fahsr sasla fin faclu ke kasrkusrak,
Kom futfutungya facl puspis ke folo lom.
13 Kom illa in molela mwet lom,
In molela tokosra lom su kom sulela.
Kom uniya mwet kol lun mwet koluk
Ac sukela mwet lal nukewa.
14 Mwe pisr nutum fakisya ac sasla ke mwet kol fulat lun un mwet mweun
Ke elos tuku oana sie paka in liskutelik.
Elos engnu oana mwet su akkeokye mwet sukasrup in lukma.
15 Horse nutum uh futungya inkof uh,
Oru inkof uh wiawala.
16 Nga lohng ma inge nukewa, ac nga rarrar;
Ngoasrok rarak ke sangeng.
Monuk ulla,
Ac niuk tukulkul.
Nga fah misla tupan pacl se
Ke God El ac fah kalyei mwet ma mweuni kut uh.
17 Sak fig finne wangin fahko
Ac wangin grape ke oa in grape uh,
Sak olive finne tia fokla
Ac ima uh finne tia isus fahko,
Sheep nukewa finne misa
Ac kalkal in cow uh pisala,
18 Nga fah srakna insewowo ac engan
Mweyen LEUM GOD El langoeyu.
19 LEUM GOD Fulatlana El ase ku nu sik.
El oru niuk in oakwuk oana soko deer,
Ac karinginyu fineol uh. 2 Sam 22:34; Psa 18:33