2
Kaiyuk Lun Leum Nu Sin Jerusalem
1 In kasrkusrak lun Leum, El afinya Zion ke lohsr matoltol.
El ekulla ma wo nukewa lun acn we nu ke ma na pilasr.
Finne Tempul lal, El ngetla liki pac ke len in kasrkusrak lal.
2 Leum El kunausla siti srisrik nukewa in acn Judah, ac tiana pakomuta.
El kunausya pot ku ma lisring acn we.
El aklusrongtenye tokosrai sac ac mwet kol nukewa lun acn we.
3 In kasrkusrak lal El kunausya ku lun Israel;
El tia lungse kasrekut ke mwet lokoalok elos tuku.
El kasrkusrak lain kut oana sie e su esukak ma nukewa.
4 El aksuwosye mwe pisr natul nu kacsr oana mwet lokoalok se;
El onelosla nukewa su kut tuh lungse ac insewowokin meet.
Inge in acn Jerusalem kut arulana pulakin usren kasrkusrak lal.
5 Leum El kunausla Israel oana sie mwet lokoalok;
El oru tuh pot ku ac inkul fulat sin tokosra in arulana mwesri.
El use nu fin mwet Judah mwe asor su wangin saflaiya.
6 El fukulya Tempul su kut alu nu sel we nu ke ip srisrik.
El tulokinya in wanginla len mutal ac len Sabbath.
Tokosra ac mwet tol elos kewa pulakin kuiyen kasrkusrak lal.
7 Leum El ngetla liki loang in orek kisa lal, ac som liki Tempul mutal sel.
El lela mwet lokoalok in ikruiya pot kac.
Ke elos kutangla, elos sasa in acn ma kut tuh engan in alu we meet.
8 LEUM GOD El otela mu pot Zion enenu na in ikori.
El srikeya in kalem na pwaye lupan acn ma ac kunausyukla.
Tower ac pot in kalkal uh tukeni na oan musalla.
9 Mutunpot kac pukpuki oan mokutkuti, ac osra kac uh kipatpat uh.
Inge tokosra ac mwet leum uh kewa elos oasr in sruoh.
Ma Sap uh tia sifil lutiyuk, ac wanginla aruruma lun mwet palu ma tuku sin LEUM GOD.
10 Mwet matu lun Jerusalem elos muta infohk uh tia kas.
Kutkut oan fin sifalos ac elos nukum nuknuk yohk eoa.
Mutan fusr elos srimi nwe infohk uh.
11 Mutuk totola ke tung, ac insiuk keoklana.
Nga foroti in asor luk ke mwet luk su kunausyukla.
Tulik fusr ac tulik srisrik uh mulalla na oan fin inkanek in siti uh.
12 Elos tung nu sin nina kialos ke elos masrinsral ac malu;
Elos ikor fin inkanek uh oana in fakfuki elos.
Ac kuiyalos sriksrikeni nwe ke na elos misa inpoun nina kialos.
13 O Jerusalem, Jerusalem saok sik, mea nga ku in fahk?
Nga ac akwoye kom fuka? Wangin mwet nu pulakin keok ouinge.
Ongoiya nu sum inge yoklana, oana lupan meoa uh. Wanginna finsrak in sifil akwoyeyuk kom.
14 Wangin ma mwet palu lom tuh fahk nu sum sayen kikiap mukena.
Kas in luti lalos nu sum kiapwekomla, mweyen elos tia fahkak ma koluk lom.
Elos oru kom nunku mu kom tia enenu in auliyak.
15 Mwet ma fahsryak in siti uh ngetot liye kom ac srengak sum.
Elos usruk sifalos ac isrun musalla lun Jerusalem, ac fahk,
“Ku siti na kato sac pa inge? Ku pa inge wo se ma faclu yukin uh?”
16 Mwet lokoalok lom nukewa aksruksrukye kom ac sracsralik liye kom ke srunga lalos.
Elos sralak ngoasrolos ac fahk, “Kut kunausulla!
Pa inge len se kut muta soano ah!”
17 LEUM GOD El tufahna orala ma se El tuh aksangengye kut fahk mu El ac oru ah;
El kunauskutla ac wanginna pakomuta lal nu sesr, oana ke El tuh fahk nu sesr pacl loeloes somla ah.
El sang kutangla nu sin mwet lokoalok lasr, ac akenganyalos ke kunausyukla kut uh.
18 O Jerusalem, lela pot ku lom in wowoyak nu sin Leum!
Lela sroninmotom in sororla oana infacl ke len ac fong.
Oru nwe ke na kom mwemelilla ke tung ac asor.
19 Lela kom in tukaki tukakyak ac pang nu sin Leum ke fong nufon se;
Fahkak nufon ma oan in nunak lom an nu sel, ac kwafe sel Elan pakoten nu sin tulik nutum
Su masrinsral ac apkuran in misa ke insruwasrik in inkanek nukewa!
20 Ngetma, O LEUM GOD! Efu kom ku kalyei kut ange?
Mutan elos kang monin tulik natulos su elos kuloi!
Mwet tol ac mwet palu elos anwuki na in Tempul!
21 Mwet fusr ac mwet matu uh kewa misa oan inkanek uh.
Mukul fusr ac mutan fusr anwuki ke cutlass nutin mwet lokoalok.
Kom onelosi ac tiana pakomutalos ke len in kasrkusrak lom.
22 Kom solama mwet lokoalok luk in tuh akpwaryalos ke mwe aksangeng rauniyula,
Ac wangin mwet ku in kaingla ke len in kasrkusrak se lom uh.
Elos akmuseya tulik nutik su nga tufahla ac kuloi.