29
[Psalm lal David]
Lohngyuk Pusren LEUM GOD In Paka Uh
1 Kaksakin LEUM GOD, kowos lipufan inkusrao;
Kaksakin wolana lal ac ku lal. 29:1–2; Psa 96:7–9
2 Kaksakin Ine wolana lun LEUM GOD;
Epasrla ye mutun El su Mutal ke El sikme in wolana lal.
3 Pusren LEUM GOD lohngyuk fin kof uh.
Ke God lun wolana El kaskas, pusracl oana pusren pulahl
Ngirngir fin meoa uh.
4 Pusren LEUM GOD lohngyuk —
Pusra kulana ac fulatlana.
5 Pusren LEUM GOD koteya sak cedar,
Finne sak cedar in Lebanon.
6 El oru fineol in acn Lebanon in srosro oana ke soko cow fusr el srosro,
Oayapa tuh Fineol Hermon in srosro oana soko cow mukul.
7 Pusren LEUM GOD oru tuh sarom in sarmelik.
8 Pusracl oru tuh acn mwesis uh in kusrusr;
El osrokak acn mwesis in Kadesh.
9 Pusren LEUM GOD osrokak sak oak
Ac osrokla sra nukewa insak uh,
Ac elos nukewa su muta in Tempul lal elos wowoyak ac fahk, “Wolana nu sin God!”
10 LEUM GOD El leum fin kof loal,
El leum oana sie tokosra nwe tok ma pahtpat.
11 LEUM GOD El sang ku nu sin mutanfahl sel,
Ac akinsewowoyalos ke misla.