35
[Psalm lal David]
Sie Pre In Suk Kasru
1 LEUM GOD, lainulos su lainyu,
Ac mweunelos su mweun lainyu!
2 Srukak mwe loeyuk ac mwe loang lom
Ac fahsru moliyula.
3 Srukak osra ac tula in mweun nutum
Ac lainulos su ukweyu.
Wulema nu sik lah kom ac moliyula.
4 Lela tuh elos su suk in uniyu
Elos in kutangyukla ac akmwekinyeyuk!
Lela tuh elos su kinauk pwapa koluk in lainyu
Elos in folokinyukla ac akfohsyeyukyak!
5 Lela tuh elos in oana loa su eng uh okla
Ke lipufan lun LEUM GOD ukwalos.
6 Lela tuh inkanek lalos in lohsr ac musresre
Ke lipufan lun LEUM GOD srunglulosi!
7 Elos filiya mwe kwasrip in sruokyu ke wanginna sripa,
Ac elos pukanak luf loal tuh in sruokyu.
8 Tusruktu kunausten ac fah sruokolosi meet liki elos etu;
Elos ac fah sremla in kwasrip lalos sifacna
Ac putatyang nu in kunausten.
9 Na nga ac fah engan ke sripen LEUM GOD;
Nga ac fah engan mweyen El moliyula.
10 Ke insiuk nufon nga ac fah fahk nu sin LEUM GOD,
“Wangin sie oana kom.
Kom loangulosla su munas, liki elos su ku,
Ac mwet sukasrup, liki poun mwet funmwet.”
11 Mwet koluk elos orek loh lainyu
Ac akkolukyeyu ke ma koluk su wangin etu luk kac.
12 Elos folokin nu sik ma koluk ke ma wo,
Ac forteya nunak luk.
13 A ke elos mas, nga nuknukyang ke nuknuk in asor;
Nga lafwekinyu sifacna ac tia eis mwe mongo;
Nga kui nwe ten ke nga pre,
14 Oana ngan pre ke sie mwet kawuk luk, ku sie tamulel wiuk.
Nga fahsr kui ke asor luk,
Oana mwet se su asor ke nina kial sifacna.
15 A ke nga muta in ongoiya, elos nukewa engan
Ac fahsreni in aksruksrukyeyu;
Mwetsac elos puokyu
Ac sringilyu.
16 Elos sracsralik nu sik ke kasrkusrak,
Oana sie mwet funmwet el aksruksruki sie mwet sukapas.
17 Leum, putaka kom ac suiyuwi ac tia kasreyu?
Karinginyu liki mwet su orek lokoalok nu sik;
Moliyula liki lion inge!
18 Na nga fah fahk kulo nu sum in walil lun mwet lom;
Nga ac fah kaksakin kom ye mutalos nukewa.
19 Nikmet lela mwet lokoalok luk, su kikiap,
In engankin munas luk.
Nikmet lela elos su srungayu ke wangin sripa
In pwarkin asor luk. Psa 68:4; Jn 15:25
20 Tuh elos tia kaskas in kulang;
A elos kinauk kain in kikiap nukewa ke mwet su lungse suk misla.
21 Elos akkolukyeyu ac fahk,
“Kut liye na ma kom oru!”
22 Tusruktu, LEUM GOD, kom liye na ma inge.
Nikmet misla, Leum;
Nik kom loesla likiyu.
23 Mukuiyak, O Leum God, ac kasreyu;
Tuyak, Leum God luk, ac oru tuh nununku suwohs in wiyu.
24 LEUM GOD, kom suwoswos, ke ma inge akkalemye lah wangin mwetik;
Nikmet lela tuh mwet lokoalok luk elos in aksruksrukyeyu.
25 Nikmet lela elos in fahk insialos mu,
“Kut kunausulla!
Sun na pwaye lungse lasr!”
26 Finsrak tuh elos nukewa su engankin keok luk
In arulana kutangyukla ac akfohsyeyukyak;
Lela tuh elos su fahk mu elos wo likiyu
In akmwekinyeyuk ac akpusiselyeyuk.
27 Lela tuh elos su wiyu lac,
In sasa ke engan ac fahk,
“LEUM GOD El fulatlana!
El insewowo ke kutangla lun mwet kulansap lal.”
28 Na nga ac fah fahkak ke suwoswos lom,
Ac nga ac fah kaksakin kom len nufon.