143
[Psalm lal David]
Sie Pre In Suk Kasru
1 LEUM GOD, lohng pre luk;
Ke suwoswos lom, porongo mwe siyuk luk;
Ke oaru lom, topukyu!
2 Nik kom nununkeyu, mwet kulansap lom.
Wangin sie mwet suwoswos ye motom. Rom 3:20; Gal 2:16
3 Mwet lokoalok luk elos ukweyu
Nwe ke na elos kutangyula.
Elos filiyuwi in sie presin lohsr,
A nga oana elos su nu misa pacl loeloes somla.
4 Ke ma inge nga akola in fuhleak finsrak luk;
Insiuk arulana toasrla.
5 Nga esamak ke pacl meet ah;
Nga nunku ke ma nukewa kom oru,
Ac nga esamak orekma lom nukewa.
6 Nga asroeak pouk nu sum ke nga pre;
Ngunik malu keim, oana ke infohk uh paolana.
7 Topukyu inge, LEUM GOD,
Wanginla finsrak luk.
Nik kom wikinkomla likiyu,
Ac pwanang nga in welulosla su oatula nu infulan misa.
8 Akesmakinyeyu ke lungkulang lom ke lututang nukewa,
Tuh nga filiya lulalfongi luk in kom.
Pre luk sowak nu yurum.
Akkalemye nu sik inkanek nga in fahsr kac.
9 LEUM GOD, nga kaing nu yurum tuh kom in karinginyu;
Moliyula liki mwet lokoalok luk.
10 Lutiyu nga in oru ma lungse lom,
Tuh kom God luk.
Oru wo nu sik, ac kolyu ke inkanek wo.
11 LEUM GOD, moliyula oana kom tuh wulela.
Ke wolana lom, moliyula liki mwe ongoiya nu sik.
12 Ke sripen lungse lom nu sik, uniya mwet lokoalok luk,
Ac kunausla mwet nukewa su akkeokyeyu,
Mweyen nga mwet kulansap lom.