2
1 Ros inima se na in acn Sharon pa nga,
Oana sie ros kiuf infahlfal uh.
Verse Lun Mukul Se
2 Oana sie ros kiuf inmasrlon kokul uh,
Ouinge el su saok sik inmasrlon mutan uh.
Verse Lun Mutan Se
3 Oana soko sak apple inmasrlon sak inima uh,
Ouinge lumweyen el su saoklana sik inmasrlon mukul saya uh.
Nga lungse na muta ye lulin sak apple soko inge.
Ke nga ema fahko kac uh arulana emwem.
4 El usyula nu in acn in orek kufwa lal
Ac olak flag in lungse lal fuk.
5 Folokonak ku luk ke raisin,
Ac akwoyela ikok ke apple uh!
Nga kuf na pwaye ke nunkeyen lungse lom.
6 Nga ilung lac paol lasa,
Ac lac paol layot kafisyuyang nu yorol.
7 Kowos mutan Jerusalem, wulema nu sik
Ke inen kosro mui ac kato inima uh,
Lah kowos fah tia oru kutena ma in lusrong pacl in pwar lasr uh.
On Soko Aklukwa
Verse Lun Mutan Se
8 Nga lohng pusren el su nga lungse.
El kasrma srosro fineol uh,
El yume tupalma inging uh nu yuruk.
9 Kawuk luk ah el oana soko kosro gazelle,
Oana soko deer fusr mukul.
El a tu pesinka uh.
El ngetma ke winto ah,
Ac yoryor ke lisrlisr wasengseng uh.
10 Ma se luk ah el kasma nu sik.
Verse Lun Mukul Se
Fahsru, kuiyuk,
Kom su oaskulana, fahsru kital som.
11 Pacl mihsrisr uh safla; ac af uh wanginla;
12 Ros uh fokla yen nukewa inimae.
Inge pacl in on;
Pusren wuleoa uh lohngyuk in acn sesr.
13 Fokinsak fig uh mutawauk in mwesrla;
Foulin ros ke grape uh akkengyela acn uh.
Fahsru, kom su saok sik,
Kom su oaskulana sik, fahsru wiyu.
14 Kom oana sie wuleoa su muta
In luf pe fulu uh.
Nga ke liye ngetnget oasku se lom an;
Nga ke lohngak pusra kato se lom.
15 Ros ke ima in grape lasr uh farngelik tari,
Kut enenu in sruokya kosro fox srisrik uh meet liki elos kunausla ima lasr uh.
Verse Lun Mutan Se
16 Ma na luk pa mukul se nga lungse, ac nga ma na lal.
El mukena kite un kosro natul uh inmasrlon ros kiuf uh
17 Nwe ke na engyengsrik in lotu uh tuhme,
Ac lohsr uh wanginla.
Folokla, kom su saok sik, kasrla oana soko gazelle mui,
Oana soko deer mukul el kasrusr ke tohktok lun eol uh.