1 Nlume wa wuuziti owula ohisala ommaruwela, ila onlipisele saana nkhama papaawo, mashaapu nkhama attwiizo, 2 aakha a wuuziti owula nkhama amamazo, na aamwari nkhama alupuwo wookemaanivo.

3 Owaatthantte aakha oofweliwa pi amanna zaya, apale khweele ahina ntthu woowaatthantta. 4 Ila nkhama owaapho namafweliwa ti mannawe ariina aana ama atuulu, atthaapo mwanzo asome mwentto wa tiini antthanttaka jamaayaya. Etthiipo apapazaya phi aniwaariphaavo. Eto etthu enintuvelaaye Nnyizinku. 5 Muukha woofweliwa ti mannawe, woohiina ntthu wontthantta, nroromelo awe onttha wa Nnyizinku, akhanyarelaka olompa avekaka waawunikha nthana na osikhu. 6 Ila otule anjitupweezaaye nkatthi wa tuvela z'oolumwenku, hatha nkhama ori haayi oniiya woofwa. 7 Owaarume oretta etthiipo theenya, yoori vakatthi vaya ehooniwevo paathuli. 8 Ntthu amana ajamaaze haaswa-haaswa mamaawe na pipiyaawe ahiwaatthantti, akatthala epaata yawe na oninziti kaafiri.

9 Ahaatikhiwe nwarakha yawiinaneliwa namafweliwa ti mannawe muukha woohiina nyaakha siithiini na eeye muukha araliweeyo nlume moote paasi. 10 Amana eeya muukha woojuwaniwa oretta vitthu zooshapweya, woowaalela saana aanaawe, woomakeleya, amana eeya muukha aari woosakaaye moolu a atthu oottakatthiifu a Nnyizinku, aari owaawunakaaye anamathowiwa na aari okholakaaye khaazi zooshi zooshapweya, othuuto ti aatikhiwe nwarakha ya anamafweliwa pi amanna zaya.

11 Aakha awiiya anakhinzi nwarakha ya anamafweliwa pi amanna zaya ohiwaatikhemo, maana amana tuvela zaya ziziti ojinkha mmakhono wa Yinsa Al-Masiihu, antakha oraliwa. 12 Khwa nanna ethiito, antta ojipatthisa paathuli mwaasa wookattha wahati aya opule wamwanzo aarettaniyeeyo Nnyizinku. 13 Theenya antta ojinozela oviliwa, weettetta nyuupa khwa nyuupa, khahiyo oviliwaru paasi, ohankawaani, waapa na ottakhula vitthu zoohifwayi. 14 Apho, kintumerela yoori anamafweliwa pi amanna zaya apale eeyiye anakhinzi araliwe, eeyane aana alokozele vaje vaya, ahimwinkhe kiphenyo atuwi etthu yoowaalupeza vitthu zootakhala. 15 Akinoko aya apathuli anlotta Epiliisi.

16 Muumini amana eeyana jamaaye woofweliwa ti mannawe, ona yontthantta, ahinlikhele Ojama wa Nnyizinku. Alikhe yoori owahi owaatthantta apale akina oofweliwa pi amanna zaya ahina ntthu woowaatthantta.

17 Attunkhulu apale ankholaaye khaazi saana, Ojama wa Nnyizinku ona yoowaashitahi swaafu piiri, haaswa-haaswa apale antafusiraaye na apale ansomisaaye. 18 Nttakhuzi la Nnyizinku linlupa yoori: “Milomo za mompe ettukuttaka tiriku mwihifuke.” Khulupa theenya liraka: “Nakhaazi onsuhi wiiyana phakari yawe.” 19 Otule eeyiye nttunkhulu wa Ojama wa Nnyizinku ohikhupalele olokoveziwa, aheetteeni opuwa atthu awiri ama attatthu awiiya mashaahiti. 20 Wakhula otule anrettaaye twampi onshowere vakatthi wa Ojama wa Nnyizinku yoori theenya apale akina aya oove.

21 Miiyo kiniwuuza kuulipiselaka channu mmakhono wa Nnyizinku na Yinsa Al-Masiihu na malayikha apale oothawaziwa, kuutumerelaka yoori mattakhuzi apa oshututele, ohiinanelaka wala ohinthawulaka hatha ntthu.

22 Ohaakuve onthawaza ntthu nkatthi wa khaazi ya Nnyizinku yoori oheettemo ntwampi za atthu akina; ojiwerawerise wookemaanivo.

23 Mwaasa wa ejohojoho yawo na marati apale oniiyanakaaye, ohisala onywa maatiru paasi, osala onywa nenkawu viinyu vattitthiiru.

24 Awaapho atthu akinoko zinooneyaaye twampi zaya ahineeyane paathuli, ila twampi za atthu akinoko wooneya waya ziniiya zoorupaza. 25 Khwa nanna ethiito na-ye khaazi zooshapweya zinooneya, hatha epile zoohooneyi khazinwahi ojivitha.