1 Mahimo a atthu a meezirayiilu khulaamo n'yaara ya Siimutta, khusala eettetta avumulaka alawaka, nkhama etthiipo aarumiyeeyo Nnyizinku. Khumaka Refidimu ila khaariwo maati oonywa. 2 Mwaasa wa ethiito khusala anyakulisana na Munsa araka: “Oninkhe maati oonywa.” Ye khuwaajipu yoori: “Mwaasa wa niini mwinyakulisanaka na miiyo? Mwinimweezelani Nnyizinku?”

3 Ila atthu apale aarina nnyottha khusala omwaapa Munsa araka: “Waanilazeliyeniwo Misuri? Ontakha onuula na nnyottha na aana eetthu na nyama zeetthu?”

4 Aphano Munsa khunyakula ankhuwelaka Nnyizinku araka: “Kiwaarettele niini atthu apa? Ansaleela okivonya na mawe!”

5 Nnyizinku khunjipu yoori: “Olokoze, olawe wawaathuule attunkhulu a atthu a meezirayiilu na wiiyane pakhora mmakhono ethiito waapiyaniyeeyo muuttho Niilu, olawe. 6 Woone, Miiyo kinttela wiiya ottuukho vatulu wa liwe la Horeepe. Weeyo opiye liwe laya, nttinttho lintta olaza maati yoori atthu apo anywe.” Munsa khuretta etthiipile, attunkhulu a meezirayiilu eettaka omoona. 7 Puuro yaya etile khutthaja nzina la Maasa na Mariiba, maana aphale vaya meezirayiilu aanyakulisananiye na khumweeza Nnyizinku araka: “Nnyizinku ori vamote na fweeyo ama wala?”

8 Elottelanaka khuta Amalekiita oteela owoomanana meezirayiilu nti wa Refidimu. 9 Aphano Munsa khumuuza Yoshuwa yoori: “Owaathawule atthu aalume oomanane Amalekiita. Meesho kinttela wiiya vatulu wa mwaako na pakhora ya Nluku mmakhono mwaka.”

10 Yoshuwa khulawa wuumanana Amalekiita nkhama etthiipile Munsa aalupiyeeyo. Munsa, Arawu na Huri khuwelaza vatulu wa mwaako. 11 Amana Munsa alansa makhono awe meezirayiilu eetta oshintta, amana eeshusha makhono awe Amalekiita ti aari oshinttakaaye. 12 Amana makhono a Munsa ashokhera, Arawu na Huri eetta othuulaka liwe yoori Munsa eekhalevo. Oowiiri khukholelela makhono a Munsa, mmote nkhono nkha nkina nkhono nlume yoori makhono a Munsa eeye aweemela mpakha njuwa otupweela. 13 Yoshuwa khuwaashintta sawasawa anajanka a Amalekiita na phanka.

14 Aphano Nnyizinku khumuuza Munsa yoori: “Waatikhe hapari epi nkithaapu yoori zisala zuupuweleliwa na omuuze Yoshuwa yoori Amalekiita anttela wiiya oosahawiwa khwa mileele vathi wa olumwenku.”

15 Munsa khunjeka alitaari na khuntthaja yoori: “Nnyizinku akinkha oshintta”, 16 na khuri: “Nkhono mmote vakhukulu ya Nnyizinku; Nnyizinku ori nvittha na Amalekiita khapila khwa khapila.”