1 Ila Nluku khuhinsahawu Nuuhi na nyama epile za ntthuttu na mifuwo za vaje epile aarinaazo mmwaaraka, khuperekha pheevo yoori evitelele vatuniya, maati khwaaza ovwa.

2 Matthatta apale awiicha na milako za pinku khufukiwa, vuula khwaamusa, 3 maati khwaaza ovwa vattiitthi-vattiitthi mpakha siikhu miiya na hamusiini. 4 Siikhu khumi na sapa ya mweezi wasaapa aaraka otule khuphweruwa vanyaako za Araraati. 5 Maati apale khusala avwa paasi mpakha siikhu yamonsi mweezi wakhuumi khwaaza wooneya mithoma za nyaako.

6 N'oovira siikhu arupayiini Nuuhi khufukula ettakha* Ettakha eleelo eti enriwa janela. ya aaraka etile aattaliyeeyo. 7 Khumfukulela nakhuku khusala avava azukulelaka mpakha maati ovwa. 8 Elottelanaka khufukulela jiwa yoori yoone nkhama maati avwa vatuniya. 9 Ila jiwa etile khuhisikani puuro yoomorela khurutela mmwaaraka, mwaasa yoori tuniya nalelo yaari ehinavuuwe. Jiwa khurutela wa Nuuhi, khusarula nkhono awe khukhola jiwa etile khuvirisa mmwaaraka. 10 Nuuhi khuvira awejaka mpakha siikhu sapa, khuruma jiwa ethiitile swaafu yaphiiri. 11 Khuruti njuwa-looveva elumiye nthapa liwishi l'ooluveera, aphano Nuuhi nawoona khujuwa yoori maati avwa vatuniya. 12 Khuweja theenya siikhu sapa khuruma jiwa ethiitile opheya, ila swaafu eti khuhiruti.

13 Siikhu yamonsi ya mweezi wa mfunko monsi wakathi Nuuhi aarinaavo nyaakha miiya sitha na mmote, maati apale aazamisiyeeyo tuniya khukakhamela. Nuuhi khufunula tarato ya aaraka khoona yoori nshaka wooma. 14 Siikhu eshiriini na sapa ya mweezi waphiiri, tuniya khuuma saaneene.

15 Aphano Nnyizinku khumuuza Nuuhi yoori: 16 “Wiishukhemo mmwaaraka mpho weeyo, muukhaawo, aanaawo na aakhaaya. 17 Wiishushe nyama zooshi oriinaazo waaza anyannyi, nyama na epi zinjipurulaaye vathi. Osarule zimwazeyele vatuniya, zittheerelane zaattelane.”

18 Nuuhi na muukhaawe, aanaawe na aakhaaya khwiishukha mmwaaraka mphule. 19 Khusarulamo nyama epile zooshi zinjipurulaaye vathi, anyannyi ooshi, na zooshi etthiipile zineettettaaye vatuniya, wakhula moote na jaati yaya.

20 Nawiisha, Nuuhi khunjeka alitaari woorettavo twaha yoomwinkha kafwara Nnyizinku. Ye khuthawula nyama epile kinoko zaya za halaali, na anyannyi a halaali akinoko aya, khushija, khulawa khuretta twaha yoolukuziwa vaalitaari. 21 Nnyizinku khusiila arufu yonkhurunusha rooho khulupa mwennyeweru yoori: “Akinteela orutela theenya olaani tuniya mwaasa wa pinaatamu, eeyaru pure wootakhala rooho ovokoliwa-wene. Akinteela orutela opwetecha zumpe zooshi nkhama nanna eti kirettiyeezo.