1 Paata yoovira vitthu epile, namootela zoonywa za mfwalume na namuupa-phaawu khunkosa mbwanaaya, mfwalume wa Misuri. 2 Firawuuna khwiiya wa wiiphiiriwa pi annya-khaazi awe apo awiri; nttunkhulu wa wootela zoonywa na nttunkhulu wa wuupa phaawu. 3 Khuruma olawa ofukeliwa nkalapooso ya nttunkhulu wa anamweekesela, nttumphule aafukeliweemo Yuusufu. 4 Nttunkhulu wa anamweekesela khumwinkha Yuusufu atthu apale awiri yoori asala awaatthantta, yo khwiikhala siikhu za waatta nkalapooso.

5 Osikhu mmote oowiri khulottha, wakhula jozi yaarina maana aya, etile ya namuupa-phaawu na ya namootela zoonywa.

6 Mmeesho mwaya supu Yuusufu khulawa owaathotola, khuwaasikana ari ooshukulikha. 7 Aphano ye khuwoozela annya-khaazi a Firawuuna apale aafukelaniweeyo araka: “Leelo mwakafilikhela-ni?”

8 Yo khunjipu yoori: “Neetta wiiyana jozi khuhiivo ntthu wootaphulela maana aya.”

Yuusufu khujipu yoori: “Ila Nluku paasi ti ye anttelaaye otaphulela jozi epo, kuuzeni jozi zaya epo.”

9 Nttunkhulu wa wootela zoonywa khumuuza jozi yawe Yuusufu araka: “Kaalotthiye okiteeliye nrayi wa wuuva omaasho waka. 10 Orina virapi ttatthu za waaleya na khwiima mishumo zaari ottokotthaaye miwawa-miwawa. 11 Pilawuri ya Firawuuna eri mmakhono mwaka. Miiyo khuthuula mishumo za wuuva khuvinyela mpilawuri mphule kimwinkha mmakhono mwawe.”

12 Yuusufu khuri: “Maana a jozi yawo eto pi apa: virapi ttatthu enlupa siikhu ttatthu. 13 Nkatthi wa siikhu ttatthu Firawuuna ontta wuulazamo nkalapooso orutele khaazi yawo ya wootela zoonywa za mfwalume na omwinkha pilawuri mmakhono mwawe, nkhama etthiipo waari orettakaazo raku. 14 Ila amana zooshi ziweettettelaka saana ohikisahawu, kinuuhirimiza yoori okoonele huruma omuuze mfwalume monkoni wa miiyo, okaawuni yoori kileemo nkalapooso mphu. 15 Miiyo keetta wiiyiwa nti wa Meebereewu khutiisiwa mmuti mphu khweeseleliwa nkalapooso hatha etthu kihiretteeni.”

16 Asiiliyeevo nttunkhulu wa wuupa phaawu yoori Yuusufu aataphuleliye jozi etile wooshapweyavo, ye khumuuza yoori: “Na-miyo kinaaye yaaka, kalottha kipwecheriye phaawu khelenke ttatthu. 17 Khelenke eti ya vatulu zaarimo wakhula nanna ya phaawu epile zontuvela Firawuuna, ila anyannyi khusala ajoropoja ziri veeshwa vaka.”

18 Aphano Yuusufu khunjipu yoori: “Jozi yawo eto maana pi apa, khelenke ttatthu epo enthoonyeza siikhu ttatthu. 19 Nkatthi wa siikhu ttatthu etthiipo, Firawuuna onlawa athomeye eeshwa mmutthi, mwiili awo osala ojoropojiwa pi anyannyi.”

20 Siikhu yattaatthu yaari siikhu Firawuuna aari orettaaye mwaakha, ye khujisa njampo na annya-khaazi awe ooshi, khuruma okhuweliwa apale aari nkalapooso namuupa-phaawu na namootela zoonywa. 21 Namootela zoonywa khurutiseliwa khaazi yawe ya wootela na yoomwinkha pilawuri Firawuuna mmakhono mwawe. 22 Ila Firawuuna khunthomeya namuupa-phaawu nkhama etthiipile aalupiyeezo Yuusufu.

23 Aphano namootela zoonywa otule khuhinfikhiri Yuusufu khunsahawu eperepere.