1 Yaakhumpa n'oojuwa yoori Misuri ewaakho etthu-yoojiwa, khuwooza aanaawe araka: “Mwineekesana yoori niini? 2 Kasiila oriwa Misuri ewaakho tiriku, apho mwilawe moozanye nite nijilelane nihifwe jala.”

3 Aphano khulankha attwiize Yuusufu khumi khusala alawa Misuri wuuzanya tiriku. 4 Yaakhumpa khunkhattaza Bejami ttwiiye Yuusufu owaalotta attwiize amoovisaka ompattha etthu yootakhala. 5 Aana a Yaakhumpa khulawa wuuzanya tiriku nkhama etthiipo aari olawaazo atthu akina, maana tuniya yooshi ya Kanaani yaarina jala.

6 Yuusufu nttunkhulu wa Misuri, ti ye aari owoozanyezaaye tiriku atthu ooshi a mmuti. Attwiize n'oofiya khunkokhorela ajihi zaya khufiisa vathi. 7 Wakathi awooniyeevo khuwaajuwa, ila khumpuwa nkhama ahiwaajuweeni. Khusala awoozela awaatuturuchaka araka: “Mweeyo! Mwinlankha vayi?”

Yo khunjipu “Ninlankha tuniya ya Kanaani, naateeliye wuuzanya etthu-yoojiwa.”

8 Yuusufu khuwaajuwa attwiize ila yo khuhinjuwi. 9 Ye khupayini jozi epile aawooziyeeyo khuri: “Mweeyo mw'aahankawaani! Mwaateeliye ojuwa siiri za mmuti mwetthu mphu.”

10 Yo khunjipu araka: “Wala mbwaneetthu! Fweeyo akarumeyeenu naateeliye wuuzanya etthu-yoojiwa. 11 Fooshi papeetthu mmote, n'aatthu awaamineya. Khahi n'aahankawaani.”

12 Yuusufu khusala akhanyarela owooza yoori: “Wala mweeyo mwateela ojuwa kiphenyo za mmuti mwetthu mphu.”

13 Yo khuri: “Fweeyo ninlankha tuniya ya Kanaani, niri aana khumi na awiri paapa mmote. Otu w'eefutti aya nasaapi eti asala onti na paapa, ila otu nkina aya afwa.”

14 Khurutela owooza araka: “Pi etthiipo kilupiyeezo! Mweeyo mw'aahankawaani! 15 Apho kintakha kiwooneni. Kinlapha khwa ohaayi wa Firawuuna, yoori khamwinlaavo apha mwihintiiseeni ttwiiyenu oto w'eefutti. 16 Mwinrume ntthu mmote amweettele, ila apa akina ansalaaye anttela ofukeliwa. Noone nkhama mattakhuzi apa mwilupiyeeyo pi ookhweele. Ila mmana ehiiyi toowo kinlapha khwa ohaayi wa Firawuuna yoori phi mwinttelaavo ojuweya wiiya ahankawaani.” 17 Ye khuwaattha nkalapooso siikhu ttatthu.

18 Siikhu yattaatthu khuwooza yoori: “Miiyo kinimoova Nluku, apho nkhama mweeyo mwintakha wuusuru nafusi zenu, mwiri toono: 19 nkhama mw'aatthu awaamineya mwinlikhe ttwiiyenu mmote nkalapooso, apa akina athuule tiriku awenkhe ajamaazenu ahifwe jala. 20 Mwikitiisele ttwiiyenu oto w'eefutti kihakikhi nkhama mattakhuzi enu pi ookhweele, mwirettaru toowo khamwinuuliwa. Yo khukhupalela oretta epile ooziweezo.”

21 Aphano khusala oozana yoori: “Khweele ninaaye paathuli mwaasa wa ttwiiyetthu. Maana wakathi aashankiyeevo aanivekeliye yoori nimoonele huruma ila fweeyo khuhitakhi, apha t'iiti na-fweyo anipatthiyeeyo matteso apa.”

22 Ruubeni khujipu araka: “Miiyo akaalupiye yoori shapu oto mwihinrettele vitthu zootakhala? Ila mweeyo khuhitakhi okisiileza! Apho nina yoojipu mwaasa w'oofwa wawe.”

23 Yo khaari ojuwa yoori Yuusufu aari osiila epile aari ottakhulaazo, mwaasa yoori attakhulaka aarivo ntthu aari otaphulelaaye.

24 Yuusufu khuwaasusa vattitthiiru khusala alila. Nawiisha khurutela attaaphale khusala attakhula, aphano khunthawula Simiyooni khuruma yoori afukiwe eettaka omoona.

25 Elottelanaka Yuusufu khuwaaruma anakhaazi awe wiitaaza tiriku visurupa za attwiize na owaarutisela nzurukhu aya sirini atthaaka mvisurupa nttumpho, na owenkha etthu-yooja ntarikhi. Khurettiwa etthiipo. 26 Khuthuula visurupa epile wakhula ntthu khuttha vapuuru vawe khusala alawa.

27 N'oofiya vahali aalaliyeevo, mmote khufukula esurupa yawe yoori alazemo etthu-yoojiwa enkhe puuru yawe, khusikana nzurukhu awe ori mwiisurupa nttumphule. 28 Khuwooza attwiize yoori: “Moone! Nzurukhu aka karutiseliwa, opu ori mphu!”

Aphano yo khusuthuwa khusala athukumela na woova oozelanaka yoori: “Niini epi Nluku aniretteliyeezo?”

29 N'oofiya wapapaaya Yaakhumpa tuniya ya Kanaani, khusala amuuza zooshi za waavireliyeezo araka: 30 “Nttunkhulu wa Misuri eetta onituturucha anuuzaka yoori n'aahankawaani. 31 Ila fweeyo khujipu yoori: ‘Khahi n'aahankawaani n'aatthu awaamineya. 32 Niri khumi na awiri paapa mmote, mmote afwa, nkina aya w'eefutti asala onti na paapa tuniya ya Kanaani.’

33 Aphano nttunkhulu wa nti aya opule khunuuza yoori: ‘Mwinlikhe ttwiiyenu mmote attaapha, toowo phi kinttelaavo ojuwa yoori mweeyo mw'aatthu awaamineya: mwithuule etthu-yoojiwa mwilawe mwawenkhe ajamaazenu ahifwe jala. 34 Mwitaaka mwintiise ttwiiyenu otu w'eefutti aya, kaamini yoori mweeyo khahi mw'aahankawaani ila mw'aatthu awaamineya. Ttwiiyenu kintta wuurutiselani, kiwinkheni ejaaza yooretta zanshara zenu mmuti mphu.’ ”

35 Wakathi afukuliyeevo visurupa zaya, wakhula esurupa khusikanamo mfukho wa nzurukhu, yo na papaaya nawoona nzurukhu opule khusala oova. 36 Aphano papaaya khulupa yoori: “Mweeyo! Mwintakha okiishisela aanaaka. Yuusufu ti otule aashikhiyeeyo, Simiyooni khaavo apha na Bejami mwintakha onthuula theenya! Zooshi epo othunku aya ti miyo kinoonaaye.”

37 Ruubeni khumuuza papaawe yoori: “Mwikinkhe miiyo khanaashikha kininrutisa, amana kihinrutisi mwiwoole aanaaka apale awiri.”

38 Yaakhumpa khujipu araka: “Akinintakhisa Bejami olawa na-mweyo, Yuusufu afwa, ye ti asaliyeeyo. Amana empattha etthu yootakhala ntarikhi okho mwineettaawo, mwintta okishukhelisa aahera na pwi zaka kirina huzuni yoototheliwa ti mweyo.”