1 Aarivo mfwarizeewu mmote aari wiitthiwaaye Nikoteemu, nttunkhulu wa mayaahuuti. 2 Ye khulawa okutthanana Yinsa osikhu na khumuuza yoori: “Rabi, ninjuwa yoori onsomisa khwa phantte ya Nluku, maana khina anwahaaye oretta alama za minjuza nkhama epo, aheetteeni Nluku wiiya vamote na-ye.”

3 Yinsa khujipu yoori: “Miiyo kiniwuuzani khweele yoori, khina antakhaaye woona ofwalume wa Nluku aheetteeni ovokoliwa opheya.”

4 Nikoteemu khumuuzela yoori: “Nanna-ni ntthu anvokoliwaaye opheya ooluvaliye? Kinretteya ntthu weetta mwiirukulu wa mamaawe swaafu yaphiiri khuvokoliwa opheya!”

5 Yinsa khujipu yoori: “Miiyo kiniwuuzani khweele yoori, aheetteeni ovokoliwa na maati na Rooho khina anwahaaye weetta muufwalume wa Nluku. 6 Maana otule anvokoliwaaye khwa mwiili, mwiili, na otule anvokoliwaaye khwa Rooho, rooho. 7 Ohiiye wootikinisiwa mwaasa wa miiyo olupa yoori: ‘Enihithajiya mweeyo ovokoliwa opheya.’ 8 Pheevo envitelela aphale entakhaavo, ensiileya evumaka, ila khinjuweya ohali enlankhawo wala eneettaawo. Enrettikhana etthiipo khwa apale ooshi oovokoliwa khwa Rooho.”

9 Nikoteemu khuuzela theenya yoori: “Epo enttela orettikhana toovi?”

10 Yinsa khujipu araka: “Weeyo o mwaaliimu wa nti wa Ezirayiilu khiniweeleya vitthu epo? 11 Miiyo kiniwuuzani khweele yoori, fweeyo ninlupa etile ninjuwaaye na ninlawela oshaahiti wa etile nooniyeeyo; ila mweeyo khamwinkhupalela oshaahiti etthu. 12 Miiyo kawuuzani vitthu za vathi khamwinkhupaleeni khi mwinttela okhupalela toovi amana kiwuuzakani vitthu za pinkuuni? 13 Maana khina anawele pinkuuni woohiiyi otule alankhiyeeyo pinkuuni: Mwaana wa Pinaatamu. 14 Nkhama etthiipo Munsa alansiyeeyo nyookha n'yaara, etthiipo theenya enihithajiya Mwaana wa Pinaatamu wiiya woolansiwa, 15 yoori wakhula otule aninkhupalaaye eeyane ohaayi wa mileele.

16 Khwa nanna etthiipo Nluku apheta olumwenku afiyelela onleva Mwanawe mmote paasi, yoori wakhula otule aninkhupalaaye ahipwetheye ila eeyane ohaayi wa mileele. 17 Nluku amperekha Mwanawe voolumwenku, khahiyo yoori ahukhumu olumwenku, ila yoori olumwenku wuusurukhe khwa ye. 18 Wakhula otule aninkhupalaaye khamphukiwa, ila otule ahininkhupalaaye aphukiwa, mwaasa wa ohikhupali nzina la Mwaana mmote paasi wa Nluku. 19 Ophukiwa waya pi opu; nuuru yata voolumwenku, ila atthu khupheta yiiza, khwiiphiiriwa ti nuuru, mwaasa wa menttezi aya aari ootakhala. 20 Otule anrettaye zootakhala oniiphiiriwa ti nuuru na wala kheepu waattamela nuuru ontakha yoori khaazi zawe zihooneye. 21 Ila otule aneettettisaaye haakhi onta nnuuru, yoori zooneye saaneene, yoori khaazi zawe enkholiwa khwa Nluku.”

22 Paata ya vitthu epile Yinsa na nakhiyoni awe khweetta nti wa Yudeya, ottuukho eeshiyeewo wakathi vattitthiiru nooretta njampo la woosa. 23 Yaahaya naye aari owoosa atthu nti wa Enoomi, kharipu ya Saliimi maana aariwo maati awaatta na atthu aari ota oteela woosiwa. 24 (Vitthu epo zarettikhana Yaahaya ahinatthiwe nkalapooso). 25 Khupuwa onyakulisana khwa anakhiyoni akinaaya a Yaahaya na yaahuuti mmote monkoni wa njampo la otwahareshiwa. 26 Yo khulawa wa Yaahaya na khumuuza yoori: “Rabi, mwinyi otule waariina kaapu ya muuttho Yorotaani wanlaweliyeeyo oshaahiti, ontta woosa na atthu ooshi antta olawa ottuukho ariiwo.”

27 Yaahaya khujipu yoori: “Khina ampwekheraaye etthu aheetteeni winkhiwa pinkuuni. 28 Mweeyo mwa mashaahiti wa etile kilupiyeeyo yoori: “Miiyo akiiyo Al-Masiihu, ila ki otule aperekhiweeyo wiilokozi wawe.” 29 Namaposiwa ti wa namaposa. Swaahipu aninrumeyelaaye namaposa oninjali na onsiileza oniiya woofurahi amana asiila huula ya namaposa. Eto furaha yaka yookamilikha. 30 Enihithajiya yoori ye awule na miiyo kijipushuwise.

31 Otule anlakhaaye otulu weekhweele ori vatulu wa vitthu zooshi. Otule ari wa vathi ti wa vathi na onttakhula vitthu za vathi; ila otule alankhiyeeyo pinkuuni ori vatulu wa vitthu zooshi. 32 Ye ahakikhi epile oniyeezo na asiiliyeezo ila khina ankhupalelaaye oshaahiti awe. 33 Otule ankhupalelaaye oshaahiti awe onhakikhi yoori Nluku haakhi. 34 Otule Nluku amperekhiyeeyo onttakhula mattakhuzi a Nluku, maana ye oninkha Rooho Ttakatthiifu woohiphimi. 35 Paapa onimpheta Mwanawe na zooshi attha mmakhono mwawe. 36 Otule aninkhupalaaye Mwaana onaaye ohaayi wa mileele, ila otule aninkatthalaaye Mwaana khanlawa woona ohaayi na theenya katapu ya Nluku empharelela khwa ye.”