1 Wal deibin raidimdan ola neim blanga ebri femili blanga ola Isreil pipul. Ol dislot deibin raidimdan langa det buk gulum Det buk blanga ola king blanga Isreil. Basdam ola Juda pipul bin jidan prisana langa Bebalon dumaji deibin abum panishmen blanga olabat nogudbalawei. 2 Ol detlot pipul hubin gobek basdam langa olabat kantri bin ol detlot serramonimen, Libai pipul, detlot hubin wek langa det Serramoni Pleis en najalot Isreil pipul du. 3 Deibin ol brom detlot Juda, Benjamin, Ifreiyim en Manesa klen hubin gobek en jidan langa Jerusalem.✡ Esra 2:27; Niya 7:73 4-6 Deibin abum 690 difrinwan femili brom det Juda klen hubin jidan langa Jerusalem. Dijan na ola neim blanga detlot pipul. Yuthai bin det boswan blanga det femili lain weya bin kamat brom det san blanga Juda neim Peres. Yuthai bin det san blanga Amihad en det grensan blanga Omri. Najalot grengrenfatha blanga im bin Imrai en Bani. Esaiya bin det boswan blanga det femili lain weya bin kamat brom det san blanga Juda neim Shela. Jeyuwel bin det boswan blanga det femili lain weya bin kamat brom det san blanga Juda gulum Sera.

7-8 Wal ol dislot pipul blanga det klen blanga Benjamin bin jidan langa Jerusalem. Olabat neim bin Salu det san blanga Meshalam. Meshalam bin det san blanga Hodabaiya, en Hodabaiya bin det san blanga Hesanuwa. Aibneiya bin det san blanga Jeroham, en Ela bin det san blanga Yusi en det grensan blanga Maikri, en Meshalam bin det san blanga Shefataiya, en Shefataiya bin det san blanga Ruwel, en Ruwel bin det san blanga Aibnija, en deibin ol jidan langa Jerusalem. 9 Deibin abum 956 femilimob blanga dijan klen hubin jidan deya. Ol dislot men na bin jidan boswan blanga ola femili.

10-12 Ol dislot serramonimen bin jidan langa Jerusalem. Olabat neim bin Jedaiya, Jehoiyarib, Jeikin, en Asarai det san blanga Hilkaiya. Imbin bos blanga det Serramoni Pleis en im grengrenfathamob bin Meshalam, Seidok, Meraiyoth en Ahitab. Edaiya en Meisai bin serramonimen du. Edaiya bin det san blanga Jeroham en im grengrenfathamob bin Pashura en Melkija, en Meisai, bin det san blanga Ediyel en im grengrenfathamob bin Jasera, Meshalam, Meshilemith en Ime. 13 Detlot serramonimen hubin jidan bos langa ola femili bin 1,760. Deibin dum det wek brabli gudwei na langa det Serramoni Pleis.

14-16 Ol dislot Libai pipul bin jidan langa Jerusalem, Shemaiya, Bekbaka, Heresh, Geilal, Metaniya, Obadaiya en Berakaiya. Shemaiya bin det san blanga Hesab, en im grengrenfatha dubala bin Esrikam en Hashabaiya brom det femili neim Merarai. Metanaiya bin det san blanga Mika, en im grengrenfatha dubala bin Sikri en Eisaf. Obadaiya bin det san blanga Shemaiya, en im grengrenfatha dubala bin Geilal en Jedathan. Berakaiya bin det san blanga Eisa, en im grenfatha bin Elkana, hubin jidan langa det kantri langa det taun gulum Netofa.

17 Wal dislot na ol detlot wekinmen hubin maindimbat det Serramoni Pleis en bin jidan langa Jerusalem. Deibin Shalum, Eikub, Talman en Ahiman. Shalum bin bos blanga olabat. 18 Wal raidap langa det taim na, detlot pipul blanga olabat klen bin jidan sanraiswei langa det King Geit langa det Serramoni Pleis. Bifo tharran, deibin jidan langa detlot geit blanga detlot kemp langa ola Libai pipul.

19 Wal Shalum det san blanga Korei en det grensan blanga Ibaiyasaf, mijamet garram najalot brom det femili blanga Kora, olabat bin wotjimbat detlot geit blanga det Seikridwan Tent blanga YAWEI, jis laik ola grengrenfathamob bin dumbat basdam. 20 Finiyas det san blanga Eliyeisa bin bos blanga olabat bifo, en YAWEI bin jidan garram im.

21 Wal Sekaraiya det san blanga Meshelemaiya bin jidan wekinmen blanga wotjimbat detlot geit blanga det Seikridwan Tent blanga YAWEI du. 22 Deibin pikimat 212 wekinmen blanga wotjimbat detlot geit. Deibin raidimdan olabat neim en det lilwan taun weya deibin jidan. Basdam King Deibid en det speshalwan mesinja gulum Semyul bin gibit olabat grengrenfathamob detlot wek blanga dum. 23 Detlot en olabat femili lain bin kipgon lukaftumbat detlot geit blanga det Serramoni Pleis. 24 Detlot geit bin feising ebriwei, nowathwei, sauthwei, sanraiswei en sangodanwei, en ebri geit bin abum boswan wekinmen. 25 Olabat femilimob hubin jidan langa detlot lilwan taun gulijap bin album detlot wekinmen hubin wotjimbat detlot geit blanga sebenbala dei. 26 Detlot fobala boswan wekinmen bin brom det Libai klen. Deibin oldei lukaftumbat ol detlot rum langa det Serramoni Pleis, en ola ebrijing deibin abum deya. 27 Deibin oldei jidan gulijap langa det Serramoni Pleis, dumaji deibin wekinmen deya, en deibin oldei opinimap detlot geit ebri ailibala.

28 Wal najalot Libaimen bin lukaftumbat ola ebrijing deibin yusum blanga weshipbat. Ebritaim wen enibodi bin yusumbat detlot enijing olabat bin kaundimap ebrijing wen deibin deigimat en wen deibin bringimbek. 29 En najalot bin lukaftumbat ol detlot speshalwan ebrijing weya deibin yusumbat, en deibin lukaftumbat det flauwa, wain, oliboil, en ola gudsmelwan medisin du. 30 Bat ola wek blanga miksimap ola gudsmelwan medisin bin blanga detlot serramonimen.

31 Wal wanbala Libaimen gulum Metithaiya, det feswan san blanga Shalum blanga det femili gulum Kora, bin meigimbat detlot damba blanga ofring. 32 En sambala pipul brom det femili gulum Kohath bin lukaftumbat det wek blanga meigimbat det speshalwan damba blanga det Serramoni Pleis weya deibin yusum ebri Sebathdei.

33 Wal sambala Libaimen bin lukaftumbat det myusik blanga det Serramoni Pleis. Detlot boswan blanga olabat femili bin abum kemp langa Serramoni Pleis en dei nomo bin abum eni najalot wek, dumaji deibin wek deitaim en nait taim. 34 Ol detlot men bin boswan blanga ola Libai femili, dumaji olabat grengrenfathamob bin dum tharran bifo. Wal deibin ol jidan lidamob en deibin jidan langa Jerusalem.

35 Wal Jeiyel bin stadimap det taun gulum Gibiyan en imbin jidan deya. Im waif bin neim Meiyaka. 36 En im feswan san bin neim Ebdan, en im najalot san bin neim Suya, Kish, Beil, Nera, Neideb, 37 Gedowa, Ahiyo, Sekaraiya en Mikloth, 38 hubin det dedi blanga Shimiya. Olabat bin ol jidan deya langa Jerusalem gulijap langa najalot femili blanga olabat klen.

39 Wal Nera bin det dedi blanga Kish, en Kish bin det dedi blanga Sol. Sol bin abum fobala san neim Jonathan, Melkishuwa, Abinadeb en Eshbeil.

40 Jonathan bin det dedi blanga Meribeil en Meribeil bin dedi blanga Maika.

41 Maika bin abum fobala san neim Pithon, Melekai, Tareiya en Eihes. 42 Eihes bin det dedi blanga Jera, en imbin dedi blanga thribala san neim Elamath, Esmabeth en Simri. Simri bin dedi blanga Mosa, 43 en Mosa bin dedi blanga Biniya, en Biniya bin dedi blanga Refaiya. Refaiya bin dedi blanga Eliyeisa, en Eliyeisa bin dedi blanga Esel.

44 Esel bin abum siksbala san neim Esrikam, Bokeru, Ishmeil, Shiyaraiya, Obadaiya en Henan.