23
King Deibid bin gibit laswan wed langa ola pipul
1 Wal Jeikob det grengrenfatha blanga ola Isreil pipul bin oldei bulurrum YAWEI det trubala God. En YAWEI na bin pikimat Deibid det san blanga Jesi blanga jidan king blanga detlot pipul. Imbin meigim Deibid brabli haibala, en King Deibid bin oldei faindim brabli gudwan song blanga gibit langa ola Isreil pipul.
Wal dijan na det laswan wed weya King Deibid bin gibit langa ola Isreil pipul.
2 “Det Spirit blanga YAWEI bin tok thru langa mi.
Imbin pudum det wed blanga im langa main ronwan mawus blanga tok.
3 Det God blanga ola Isreil pipul bin tok langa mi.
Det God hu oldei maindimbat ola Isreil pipul bin dalim mi lagijat,
‘Wen eni king jidan bos gudbalawei en gibit feyago langa ola pipul en duwit langa God,
4 wal det king na jidan jis laik det san weya gidap ailibala en shain brabli braitwan langa det skai nomo garram eni klaud,
en im jidan jis laik det san weya oldei meigim ola gras gro afta wen im rein.’
5 “Lagijat gin im garra gudbala langa main femili olabat,
dumaji imbin meigim det brabli strongbala pramis langa mi olagijawan.
Im kaan breigim det pramis,
en im kaan tjeinjim det pramis du.
Wal ai nomo wandim enijing.
Oni det ting weya God bin pramis langa mi.
Tharran na ai wandim,
en ai sabi im garra duwit langa mi en seibum mi.
6-7 Bat im garra tjakidawei ola nogudbala pipul jis laik ola fama oldei tjakidawei ola nogudwan jigiwan gras.
Detlot fama oldei gajimbat detkain gras garram aiyanwan tul wulijim shabul o spiya,
dumaji dei kaan grebum detkain gras garram olabat bingga.
En dei oldei barnimap detkain gras olagijawan.”
Lagijat na King Deibid bin tok det laswan wed blanga im weya imbin gibit langa detlot Isreil pipul.
Ola nambawan solja blanga Deibid
Fes Kranakuls 11:10-41
8 Wal King Deibid bin abum sambala nambawan solja, en imbin abum thribala solja weya ola pipul bin oldei gulum olabat Det Thribala Solja. Det lida blanga Det Thribala Solja bin neim Joshabesabeth. Imbin brom det taun gulum Teikeman, en wantaim imbin fait langa 800 enami solja miselp garram im spiya, en imbin kilim olabat holot ded.
9 Det sekanwan solja brom Det Thribala Solja bin neim Eliyeisa. Imbin det san blanga Dodo brom det femili neim Eiho. Wantaim imbin deya garram King Deibid en ola Isreil solja wen deibin jingat langa ola Filastain solja hubin majurrumap miselp blanga fait, en wen detlot Filastain solja bin ran langa olabat, ola Isreil solja bin ranawei. 10 Bat Eliyeisa nomo bin ranawei. Imbin jandapbat deya gin, en imbin fait langa detlot Filastain solja miselp garram im bigwan naif. Imbin fait langa olabat raidap im bingga bin kremp, en im nomo bin deigimat det bigwan naif brom im bingga, en YAWEI bin win det fait, en afta ola Isreil solja hubin ranawei bin kambek langa det pleis weya Eliyeisa bin jandap, en deibin gajimbat ola spiya en bigwan naif brom detlot dedbala Filastain solja.
11 Det laswan solja brom Det Thribala Solja bin neim Shama. Imbin det san blanga Eigi brom det taun gulum Herara. Wantaim ola Filastain solja bin majurrumap miselp langa det pleis gulum Leihi weya deibin abum gadin weya deibin growimap loda daga gulum bin, en wen detlot Isreil solja bin fait langa detlot Filastain solja, detlot Isreil solja bin ranawei. 12 Bat Shama nomo bin ranawei. Imbin jandapbat deya gin langa midul langa det gadin, en imbin fait langa detlot Filastain solja, en imbin bidim olabat, en imbin kilim olabat ded, en YAWEI bin win det fait.
13-14 Wal King Deibid bin abum najalot nambawan solja, en ola pipul bin oldei gulum olabat Detlot 30 Solja.
Wal wantaim wen ola pipul bin stat gajimbat ola sid daga brom ola gadin, thribala solja brom Detlot 30 Solja bin go langa det keib gulijap langa det taun gulum Edulam weya King Deibid bin jidan. Imbin jidan deya langa det keib ontop langa det strongwan hil, en sambala Filastain solja bin kemp deya gin langa det pleis gulum Reifait Beli, en sambala Filastain solja bin jidan langa det taun gulum Bethlahem du.
15 Wal King Deibid bin jinggabat det taun blanga im, en imbin meigim miselp tok lagijat, “Ai wandi dringgim woda brom det wel deya gin wansaid langa det geit blanga det taun.”
16 Wal detlot thribala solja brom Detlot 30 Solja bin irrim King Deibid tok lagijat, en deibin faindim wei blanga go thru langa detlot Filastain kemp, en deibin gajim woda brom det wel, en deibin deigimbek det woda langa King Deibid. 17 Lagijat na detlot thribala solja bin dum. Bat King Deibid nomo bin wandi dringgim det woda, en imbin dalim God, “YAWEI, ai kaan dringgim dis woda, dumaji detlot thribala solja nomo bin jinggabat olabat ron laif wen deibin gajim dis woda. Detlot Filastain solja bina kilim olabat ded if dei bina luk olabat. En if mi dringgim dis woda, wal im jis laik mi dringgim det blad blanga olabat.” Lagijat na King Deibid bin tok langa God. En im nomo bin dringgim det woda. Imbin spilim det woda blanga gibit ofring langa YAWEI.
18 Wal Ebishai det braja blanga Jowab bin lida blanga Detlot 30 Solja. Wantaim imbin fait langa 300 enami solja miselp garram im spiya, en imbin kilim olabat ded, 19 en blanga tharran na ebribodi bin sabi im, en imbin jidan lida blanga Detlot 30 Solja. Imbin jidan nambawan langa olabat. Bat im nomo bin bidim detlot solja weya ebribodi bin gulum Det Thribala Solja.
20 Wal najawan nambawan solja bin neim Benaiya. Imbin det san blanga Jehoiyada brom det taun gulum Kebsil, en imbin dum olkain breibwan ting. Wantaim imbin kilim ded dubala brabli strongwan solja brom det kantri gulum Moweb. En wantaim wen deibin abum sno ebriweya langa det kantri, imbin godan insaid langa wan hol weya laiyan bin jidan, en imbin kilim det laiyan ded. 21 En wantaim imbin kilim wan solja brom Ijip. Det solja bin brabli bigwan men, en imbin abum spiya langa im bingga, en Benaiya bin fait langa im garram nalanala, en imbin grebum det spiya brom det men bingga, en imbin kilim im ded garram im ronwan spiya. 22 Ol detlot breibwan ting na Benaiya bin dum, 23 en King Deibid bin meigim im jidan bos blanga ola blijiman hubin oldei lukaftumbat im, en Benaiya bin jidan nambawan langa Detlot 30 Solja. Bat im nomo bin bidim detlot solja weya ebribodi bin gulum Det Thribala Solja.
24 Wal iya na ola najalot solja brom Detlot 30 Solja. Esahel det braja blanga Jowab, Elanan det san blanga Dodo brom det taun gulum Bethlahem, 25 Shama en Ilaika brom det taun gulum Harod, 26 Heles brom det taun gulum Pelet, Aira det san blanga Aikesh brom det taun gulum Tekowa, 27 Abaiyesa brom det taun gulum Einathoth, Mebunai brom det taun gulum Husha, 28 Seilman brom det taun gulum Aho, Maharai brom det taun gulum Netofa, 29 Heleb det san blanga Beina brom det taun gulum Netofa, Itai det san blanga Ribai brom det taun gulum Gibiya deya langa det kantri blanga det Benjamin klen, 30 Benaiya brom det taun gulum Pairathan, Hidai brom det kantri gulijap langa det taun gulum Geiyish weya deibin abum loda beli, 31 Abaiyalabon brom det Jodan Riba kantri, Esmabeth brom det taun gulum Bahurim, 32-33 Eliyaba brom det taun gulum Shalbon, det dubala san blanga Jeishan, Jonathan det san blanga Shama brom det taun gulum Herara, Eihaiyam det san blanga Sharara brom det taun gulum Herara, 34 Elifalet det san blanga Eihesbai brom det taun gulum Meiyaka, Eliyam det san blanga Ahithafel brom det taun gulum Gilo, 35 Hesro brom det taun gulum Kamul, Parai brom det taun gulum Erab, 36 Aigal det san blanga Neithan brom det taun gulum Soba, Bani brom det kantri gulum Ged, 37 Selek brom det kantri gulum Eman, Neiharai brom det taun gulum Biroth hubin oldei garrimap ol detlot faiting giya blanga Jowab, 38 Aira en Gareb brom det taun gulum Jeitiya, 39 en Yuraiya brom det traib gulum Hitait.
Wal det namba blanga ola nambawan solja weya King Deibid bin abum bin 37.