1-2 Wal det men bin deigim mi langa det Seikridwan Pleis langa det Serramoni Pleis na. Det men bin meshurum det dowa langa det rum. Imbin 3 mita kroswei en 5 mita longwei. Brom det dowa langa det tusaid kona bin 2.5 mita. Det rum imbin 20 mita longwei en 10 mita kroswei.

3-4 Brom deya det men bin wok najasaid langa det Seikridwan Pleis en imbin tok, “Najasaid langa dijan dowa jidan det Brabli Seikridwan Rum.” Imbin meshurumbat det dowa. Imbin 1 mita kroswei, en 3 mita longwei en 3.5 mita brom det dowa langa det tusaid kona. Afta imbin meshurum det Brabli Seikridwan Rum, en imbin 10 mita longwei en 10 mita kroswei.

5 Det men bin meshurum det wol langa det Serramoni Pleis, en imbin 3 mita rait thru langa det wol. Wen imbin meshurumbat detlot stowa rum deibin 2 mita longwei en 2 mita kroswei, en deibin bildimap wansaid langa det wol. 6 Deibin abum 30 rum langa graun, en 30 rum ontop langa olabat, en naja 30 rum bin ontop langa detlot najalot rum. Deibin abum 90 rum olagija, en deibin joinap garram det wol langa det Serramoni Pleis, bat dei nomo bin go insaid langa det wol. 7 Detlot wol blanga det Serramoni Pleis bin jidan brabli thikwan langa graun, bat nomo langa topwei, en detlot rum langa topwei bin jidan mowa bigwan langa detlot rum langa graun. Detlot step bin go brom det graun raidap langa detlot midulwan en topwan rum.

8 Det Serramoni Pleis bin jidan ontop langa ola gudwan ston. Detlot ston bin jidan 3 mita apendan. Detlot ston bin jidan flopat blanga detlot stowa rum weya deibin oldei kipum ola ebrijing. 9 Det atsaidwan wol blanga detlot stowa rum bin jidan 2.5 mita thikwan. 10 Det nekswan haus bin jidan 10 mita brom det stowa rum wol. 11 Wanbala dowa bin go langa det stowa rum langa det nowathsaid langa det Serramoni Pleis. Najawan dowa bin go langa detlot najalot stowa rum langa sauthsaid. Detlot stonwan flopat bin go 2.5 mita pas detlot stowa rum wol.

12 Wal aibin luk najawan haus bin jidan deya. Imbin jidan sangodanwei langa det Serramoni Pleis. Imbin 35 mita kroswei en 45 mita longwei en imbin abum wol raidaran langa im 2.5 mita thikwan.

13 Brom deya det men bin meshurum det Serramoni Pleis, en imbin 50 mita longwei. Imbin meshurum brom det bekwei wol langa det Serramoni Pleis kroswei langa opinwan pleis langa sangodansaid, en imbin 50 mita. 14 Wen imbin meshurum det frantpat blanga det Serramoni Pleis en det opin pleis langa frant, imbin 50 mita.

15 Wal det men bin meshurum det sangodansaid en detlot rum langa det enpat imbin 50 mita.

Det insaid wol langa det brenda blanga det Serramoni Pleis en det Seikridwan Pleis en det Brabli Seikridwan Rum, 16 deibin abum purdiwan wud olawei brom det flopat raidap langa detlot windo. Det dowa en detlot lilwan windo en det thribala najalot rum bin abum purdiwan wud du. 17-20 Det purdiwan wud bin stap deya ontop blanga det dowa. Det purdiwan wud bin abum olkain difrinwan pitja blanga det einjul gulum tjerabim, en deibin abum pamtri jidan langa midul langa detlot pitja. Ebri difrinkain pitja bin abum dubala feis. Imbin abum feis jis laik men lukinatbat langa det pamtri wansaid, en feis jis laik laiyan lukinatbat langa det pamtri najasaid. Dislot pitja langa det purdiwan wud bin go raidaran langa det dubala rum. 21 En det dowapos blanga det Seikridwan Pleis langa det Serramoni Pleis bin seim sheip langa ebrisaid.

Wal lida langa det dowa blanga det Brabli Seikridwan Rum samting bin deya en imbin luk laik 22 wudwan teibul blanga ofring. Imbin 1.5 mita apendan en 1 mita longwei en 1 mita kroswei, en detlot kona en det bodampat en detlot saidpat deibin meigim garram wud. Wal det men bin tok, “Dijan na meigim pipul jinggabat hau YAWEI det trubala God oldei jidan langa dijan speshalwan pleis.”

23 Wal dubala dowa bin jidan deya rait langa det enpat langa det Seikridwan Pleis, en det naja dubala dowa bin jidan deya langa det Brabli Seikridwan Rum, 24 en det dubala dowa bin breik langa midul wen deibin opin. 25 Olkain pitja blanga detlot einjul gulum tjerabim en pamtri bin jidan langa detlot dowa wulijim detlot wol. En wud bin gaburrumap det atsaidwan dowawei langa det brenda. 26 Detlot wol langa det dubala said bin abum sambala lilwan windo en bin abum pitja blanga ola pamtri.