1 Afta na YAWEI det trubala God bin tok langa Nowa, “Aibin luk ebribodi langa ola kantri oldei dumbat nogudbala ting, en aibin faindim oni yu na dumbat gudbala ting. Wal yu gowin insaid langa det bout na garram yu femili olabat, dumaji ai garra seibum yumob. 2 En blanga ol detlot difrinkain enimul weya yu yusum langa serramoni, yu garra deigim sebenbala boiwan en sebenbala gelwan garram yu. En blanga ol detlot difrinkain enimul weya yu nomo yusum langa serramoni, yu garra deigim dubala garram yu. Boiwan en gelwan yu garra deigim. 3 En blanga ola difrinkain bard, yu garra deigim sebenbala boiwan en sebenbala gelwan garram yu. Yu garra deigim ol detlot enimul en ol detlot bard langa det bout blanga bridabat afta wen det fladwoda garra godan. 4 Oni wanwik na en ai garra jandim rein langa ola kantri, en det rein garra buldan deitaim en naitaim nomo stap. Det rein garra buldan 40 dei gulijap 6 wik, dumaji ai garra draundim ebrijing weya aibin meigim, en ola enimul en ola pipul garra ol binij.” Lagijat na God bin tok.

5 Wal Nowa bin lisin langa det wed weya YAWEI bin dalim im, en imbin duwit langa im. 6 En imbin brabli olmen wen det fladwoda bin kaman. Imbin 600 yiya ol.

7 Wal Nowa en im waif en detlot thribala san blanga dubala en detlot thribala waif blanga olabat bin ol gowin langa det bout, dumaji imbin gulijap taim blanga det fladwoda,✡ Meth 24:38,39; Luk 17:27 8-9 en Nowa bin duwit langa God, en imbin deigim ol detlot enimul langa det bout. Imbin deigim ol detlot enimul weya deibin yusum langa serramoni en ol detlot enimul weya dei nomo bin yusum langa serramoni, en imbin deigim ol detlot bard du. Boiwan en gelwan imbin deigim langa det bout.

10-13 Langa det seim dei Nowa en im waif en detlot thribala san blanga im neim Shem, Hem en Jeifeth en detlot thribala waif blanga olabat bin ol gowin insaid langa det bout garram ol detlot difrinkain enimul en bard olabat.✡ 2 Pida 3:6 14-15 Ola wailwan enimul en ola kwaitwan enimul en ola buligimob en ol detlot lisid en sneik en ola bard en olkain insek, ol detlot na bin kaman langa Nowa, boiwan en gelwan, 16 en deibin ol gowin insaid langa det bout jis laik weya God bin dalim Nowa. En det seim dei YAWEI det trubala God bin jadimap det dowa blanga det bout.

Wal afta wan wik na det fladwoda bin gidap. Langa det namba 3 dei langa det sekan wik blanga det sekan manth det skai bin opinap, en woda bin kamat detmatj, en rein bin buldan deitaim en naitaim nomo stap 40 dei gulijap 6 wik.

17 Wal det fladwoda bin gidap na, en det bout bin flout ontop langa det woda, 18 en det woda bin kipgon gidap mowa en mowa blanga 40 dei, en imbin lidimap det bout mowa haibala. 19 Ebriweya det woda bin gaburrumap ola reinjis kantri. 20 Nomo enijing bin kamat na, en det woda bin jidan 7 mita dip ontop langa ola haibala hil.

21 Wal ola enimul en ola bard en ola lisid en sneik en badaflai en grashopa en ola pipul langa ebri kantri olabat holot bin ol draun. 22 Ebrijing weya bin jidan laibala bifo holot bin ol dai. 23-24 Langa ebri kantri ola pipul en ola enimul bin binij. Nomo enijing bin jidan laibala. Najing na. Holot bin ded. Oni Nowa en detlot langa det bout bin jidan laibala.