1 Wal YAWEI det trubala God bin dalim Hoseiya, “Nomeda det waif blanga yu oldei silipsilipbat garram im boifren olabat, bat stil yu garra go en dalim im yu laigim im. Yu garra laigim im jis laik mi laigim ola Isreil pipul. Nomeda dei oldei bulurrumbat ola najalot drimin en laigim dagadagat det seikridwan daga gulum reisankeik, bat stil mi laigim olabat.” Lagijat na YAWEI bin tok.

2 Wal Hoseiya bin go en baiyimbek im waif Goma. Imbin pei 15 silbawan mani en 150 kilogrem sid daga gulum bali, 3 en imbin dalim im waif, “Yu kaan silipsilipbat garram enibodi en go en miksap garram eni men. Yu garra jidan en weidabat lilbit longtaim blanga mi, en ai garra weidabat blanga yu.” Lagijat na Hoseiya bin tok.

4 Wal lagijat du, ola Isreil pipul garra jidan longtaim nomo garram eni king en bos en nomo garram eni serramoni en serramoni pleis en nomo garram detlot speshalwan klos en drimin sheip du. 5 Bambai dei garra tenim miselp en kambek langa YAWEI det trubala God blanga olabat, en dei garra bulurrum det king hu garra kamat brom det femili lain blanga King Deibid. Det taim garra kaman weya detlot Isreil pipul garra kaman bradinbalawei langa YAWEI, en dei garra abumbat ola gudbala ting weya im wandi gibit olabat.