11
Gudbala taim garra kaman
1 Wal aibin kipgon tok,
“Jis laik wen sambodi kadimdan tri en detlot bushis kamat brom det draiwan wadi,
wal wandei sambodi garra jidan king brom King Deibid femili lain.✡ Reb 5:5; 22:16
2 Det Spirit blanga YAWEI det trubala God garra jidan garram im,
blanga meigim im bulurrum det wei blanga God,
en im garra gibit gudbala wed langa ebribodi.
YAWEI garra meigim im sabi ebrijing,
en im garra oldei shoum rispek oni langa YAWEI.
3 Im garra jidan brabli gudbinjiwan dumaji im dum wanim YAWEI wandim.
Im kaan jadjimbat pipul rongwei,
en im kaan teiknodis langa enibodi hu oldei meigimbat stori.
4 Detlot powan pipul en detlot pipul hu nomo garram enibodi,
garra abum feyago en jidan brabli gudbalawei.
Det wed blanga im garra jidan jis laik det wadi blanga panishim detlot nogudbala pipul.✡ 2 Thes 2:8
5 Im garra jidan brabli trubala men,
en im garra oldei gibitbat feyago langa ebribodi.✡ Ifi 6:14
6 “Detlot lepad garra leidanbat garram ola nenigout,
en ola wailwan dog garra leidanbat garram ola lilwan ship,
en ola lilwan gabigabi en laiyan garra dagat daga mijamet,
en ola lilwan biginini garra oldei lukaftumbat ol detlot enimul.
7 Ola kau en beya garra jidan mijamet langa det grinwan gras,
en ola lilwan beibi blanga olabat garra silip mijamet.
Ola laiyan en ola buligi garra dagat gras mijamet du.
8 Ola beibi garra oldei pleipleibat gulijap langa sneik hol.
Olabat garra pudumbat olabat bingga langa det jigiwan sneik hol,
bat det sneik kaan baidim olabat bingga, najing.
9 Nomo eni jigiwan ting garra jidan langa det seikridwan hil blanga YAWEI.
Jis laik det woda weya oldei bilimap det solwoda,
det kantri garra jidan garram detmatj pipul hu oldei sabi blanga preisimbat oni langa YAWEI.”✡ Aisai 65:25; Heba 2:14
God pipul olabat garra kambek langa olabat ronwan kantri
10 Wal aibin kipgon tok, “Wal det taim im kaminap na wen wanbala biginini blanga Deibid garra jidan sain blanga ola pipul brom ebri kantri blanga kaman mijamet. Olabat garra oldei bulurrumbat wanim im oldei tok, en im ronwan kantri garra jidan brabli haibala.✡ Rom 15:12 11 En wen det dei garra kaman YAWEI garra pudumat im strongbala am, en im garra bringimbek ol im pipul hubin stil jidan laibala langa Asiriya, Ijip, Pethros, Ithiyopiya, Elam, Bebalon, Heimath, en deya langa detlot kantri wansaid langa solwoda. 12 Im garra gibit sain langa detlot kantri en im garra bringimbek ol detlot pipul weya olabat enamimob bin andimwei brom Juda en Isreil, en hubin spredat oloba langa dijan wel. 13 Ol detlot pipul brom Isreil garra stap jelasbat langa detlot pipul brom Juda, en olabat kaan jidan enami enimo. 14 Dubala garra go mijamet en fait langa detlot Filastain pipul deya sangodansaid. En olabat garra bidim detlot Idamait pipul en detlot Mowebait pipul en ol detlot Emanait pipul sanraiswei. Dei garra jidan bos langa olabat. 15 Det Redsi, gulijap langa Ijip, YAWEI garra meigim im jidan draiwan, en im garra jandim brabli hotwan win blanga kadim det Yufreitis Riba en meigim im jidan garram sebenbala krik, wulijim enibodi gin krosimbat isibalawei.✡ Reb 16:12 16 En blanga im pipul olabat hubin jidan laibala, im garra meigim det roud brabli gudwan brom Asiriya jis laik det roud bin jidan gudwan blanga olabat grengrenfathamob wen olabat bin gowei brom Ijip.”