1 Wal wanbala men neim Maika bin jidan langa det hil kantri gulum Ifreiyim, 2 en im mami bin abum bigismob mani. Bat sambodi bin stilim det mani, en im mami bin singim det sambodi.

Afta na im san bin kaman langa im, en imbin tok, “Mami, wen sambodi bin stilim det 1,100 silbawan mani brom yu, aibin irrim yubin singim det sambodi. Wal iya det mani! Yu luk! Dumaji mi na bin stilim det mani.”

Wal im mami bin tok, “Main san, YAWEI det trubala God garra gudbinji langa yu, dumaji yubin onap.” 3 En im san bin gibitbek im det mani, en im mami bin tok, “Wal ai garra gibit dijan mani langa YAWEI blanga stapam det nogudbala song, en garram dijan mani ai garra baiyim wanbala drimin sheip blanga im weya dei meigim garram silba ontop langa wud. Lagijat na ai garra gibitbek dijan mani langa God.”

4 Wal wen im san bin gibitbek det 1,100 silbawan mani langa im mami, im mami bin deigim 200 mani, en imbin gibit det mani langa wanbala men hubin oldei meigimbat ola drimin sheip, en imbin meigim det drimin sheip garram wud, en afta imbin meltimap det silbawan mani, en imbin gaburrumap det sheip garram det silba, en wen imbin gibit det sheip langa det mamiwan, det mamiwan bin pudum det sheip langa im san haus.

5 Wal Maika bin abum im ronwan serramoni pleis, en imbin meigim sambala drimin sheip, en imbin meigim klos jis laik det speshalwan shet gulum ifad weya det haibala serramonimen blanga YAWEI bin oldei yusumbat, en imbin meigim wanbala san blanga im jidan serramonimen. 6 Imbin dum lagijat dumaji detlot Isreil pipul nomo bin abum king blanga lidimbat olabat, en deibin oldei dumbat enijing weya deibin wandi dum.✡ Jadj 21:25

7 Wal wanbala men brom Libai klen bin jidanbat langa Bethlahem deya langa Juda, 8 en seimtaim wen Maika bin bildimap det serramoni pleis, det Libai men bin gowei brom det taun blanga lukabat najawan pleis blanga jidan.

Bambai na det Libai men bin kaman langa det haus blanga Maika deya langa det hil kantri gulum Ifreiyim, 9 en Maika bin askim im, “Brom weya yubin kaman?”

En imbin tok, “Mi brom Libai klen, en aibin kaman brom Bethlahem deya langa Juda, en mi lukabat pleis blanga jidan.”

10 Wal Maika bin tok, “Yu gin jidan garram mi, en yu gin jidan main serramonimen en dalim mi wanim blanga dum, en ai garra peiyim yu tenbala silbawan mani ebriyiya, en ai garra gibit yu klos en daga du.”

11-12 Wal det Libai men bin agri langa im, en imbin jidan deya garram Maika, en Maika bin meigim im serramonimen blanga im, en imbin oldei jidan deya langa im haus, en Maika bin tridim im jis laiga san.

13 Wal Maika bin tok, “Wal ai sabi YAWEI garra album mi brabliwei na, dumaji main serramonimen im brom det Libai klen.”