1 Wal longtaim bifo ola Isreil pipul bin abum king blanga jidan bos blanga olabat, wanbala men brom det Libai klen bin jidan deya langa det hil kantri gulum Ifreiyim, en imbin merrit wanbala wekingel brom Bethlahem deya langa Juda.

2 Bambai det gel bin gitwail langa im hasbin, en imbin ranawei brom im, en imbin gobek langa im dedi kemp deya langa Bethlahem. Imbin jidan deya fo fobala mants, 3 en afta det Libai men bin jinggabat blanga go en tok langa im en trai meigim im kambek langa im.

Wal det Libai men bin go en gajim im wekinmen en dubala dongki, en dubala bin go langa Bethlahem, en wen dubala bin kamat langa det kemp blanga det gel dedi, det gel bin dalim dubala blanga gowin langa det haus, en wen im dedi bin luk det Libai men, imbin brabli gudbinji, 4 en imbin dalim det Libai men blanga stap deya lilwail, en det Libai men en im wekinmen bin jidan deya 3 dei, en dubala bin dagadagat daga en abum gudtaim olawei.

5 Wal langa det namba 4 dei dubala bin gidap ailibala en meigim miselp redibala blanga gobek langa det Libai men kemp. Bat det gel dedi bin dalim det Libai men, “Yunbala jidan en dagat daga basdam blanga meigim miselp strongbala, en afta yunbala gin go.”

6 Wal dubala bin jidan en dagadagat daga en dringgimbat oldei, en afta det gel dedi bin dalim dubala, “Yunbala garra silip iya tunait en abum gudtaim bifo yunbala garra gowei.”

7 Wal wen det gel dedi bin tok lagijat, det Libai men bin gidap blanga gowei streidawei. Bat det gel dedi bin kipgon dalimbat im blanga stap, en imbin lisin langa im, en dubala bin silip deya igin.

8 Ailibala neksdei wen det Libai men bin stat blanga gowei, det gel dedi bin dalim im, “Yunbala garra dagat basdam, en yunbala gin gowei afta.” En dubala bin lisin langa im, en dubala bin stap en dagadagat daga.

9 Afta na wen det Libai men en im wekinmen bin binij dagadagat daga, dubala bin gidap blanga gowei garram det gel. Bat det gel dedi bin tok, “Yu luk. Im gulijap sangodan na. Wal yunbala lafta stap iya igin en abum gudtaim tunait, en ailibala yunbala gin kipgon.”

10-11 Wal det Libai men nomo bin wandi stap deya igin, en imbin gajim im waif en im wekinmen, en deibin gowei garram det dubala dongki garram pekbeig.

Wal wen imbin gulijap sangodan, deibin kamat langa Jerusalem weya ola Jebusait pipul bin oldei jidan, en det wekinmen bin askim im bos, “Bos, maitbi wi lafta stap en kemp iya langa dijan Jebusait taun.”

12 Bat im bos bin dalim im, “Wi kaan stap iya, dumaji detlot pipul nomo wi kantrimen. Wi garra kipgon en kamat langa det taun gulum Gibiya. 13 Deya na wi garra kemp, o maitbi langa det najawan taun gulum Rema.”

14 Wal deibin kipgon, en wen det san bin godan, deibin kamat langa det taun gulum Gibiya deya langa det Benjamin klen kantri, 15 en deibin gowin langa det taun blanga silip deya.

Wal deibin go en jidan deya langa det pak deya langa midul langa det taun, en deibin weidabat blanga sambodi blanga askim olabat blanga silip langa im haus. Bat nomo enibodi bin askim olabat.

16-17 Bambai na wanbala olmen bin kaman deya wen imbin binij wek, en imbin luk olabat bin jidanbat deya langa det pak. Det olmen bin brom det hil kantri blanga det Ifreiyim klen. Bat imbin oldei jidan deya langa det taun na garram ola pipul brom det Benjamin klen, en imbin oldei wek langa fam deya atsaid brom det taun.

Wal wen imbin luk det Libai men deya langa det pak, imbin askim im, “Brom weya yumob bin kaman? En weya yumob garra go?”

18 Wal det Libai men bin tok, “Melabat bin kaman brom Bethlahem deya langa det Juda kantri, en melabat garra gobek langa main kemp deya langa det Ifreiyim hil kantri. Bat nomo enibodi bin askim melabat blanga silip langa olabat kemp. 19 Melabat garram daga en ebrijing blanga det dubala dongki en blanga melabat. Bat nomo enibodi bin gibit melabat pleis blanga silip.”

20 Wal det olmen bin tok, “Yumob kaan silip iya langa dijan pak. Yumob garra kaman en silip langa main kemp. Ai garra lukaftum yumob.”

21 Wal afta wen det olmen bin tok lagijat langa olabat, imbin deigim olabat langa im kemp, en imbin fidim det dubala dongki, en det Libai men en im waif en im wekinmen bin abum bogi, en afta deibin dagadagat daga, 22 en deibin abum gudtaim deya garram det olmen.

Bambai na sambala brabli nogudbala men brom det taun bin kaman, en deibin jandap raidaran langa det haus, en deibin noknok langa det dowa, en deibin jingat langa det olmen, “Yu bringimat det men hubin gowin langa yu haus. Yu meigim im kamat atsaid, dumaji melabat wandi silip garram im jis laiga wuman.”

23 Wal det olmen bin kamat atsaid langa olabat, en imbin tok, “Main fren olabat, yumob kaan dum det brabli nogudbala ting langa det men lagijat. Imbin kaman langa mi, en ai garra lukaftum im. 24 Wal yumob sabi det men im garram waif, en ai garram doda, en nomo enibodi bin silip garram main doda bifo. Wotabat ai bringimat dubala langa yumob, en yumob gin dum enijing yumob wandim dum langa dubala. Bat yumob kaan dum enijing langa det men.” Lagijat na det olmen bin tok.✡ Jen 19:5-8

25 Wal detlot men nomo bin wandi lisin langa det olmen. Bat det Libai men bin gajim im waif, en imbin meigim im kamat atsaid langa detlot men, en deibin ol silip garram det gel, en deibin dum olkain nogudbala ting langa im olnait. Deibin kipgon dumbat lagijat raidap ailibala.

26 Wal wen detlot men bin binij langa det gel, det gel bin go en buldan atsaid langa det dowa blanga det olmen haus, en imbin leidan deya raidap det san bin gidap, 27 en wen det Libai men bin gidap, imbin go en opinim det dowa, en deya na imbin faindim im waif leidanbat atsaid langa det haus garram im bingga langa det dowa, 28 en imbin dalim det gel, “Yu gidap na. Wi garra go na.” Bat det gel nomo bin tok langa im, dumaji imbin dedwan.

Wal det Libai men bin pudum det gel bodi ontop langa im dongki, en imbin deigimbek det bodi langa im kemp, 29 en wen imbin kamat langa im kemp, imbin gowin langa im haus, en imbin gajim naif, en imbin deigim det bodi blanga im waif, en imbin kadim hafenhaf, en imbin jandim wanbala pat langa detlot twelbala klen blanga Isreil.✡ 1 Sem 11:7

30 Wal wen ebribodi bin luk det gel bodi lagijat, deibin ol tok, “Wi nomo bin luk diskain ting bifo, en wi nomo bin irrim enijing du. Brom det taim weya wi grengrenfatha olabat bin gowei brom Ijip raidap tudei wi nomo bin luk enijing lagijat bifo. Najing. Wal wi garra jinggabat dijan nogudbala ting weya bin hepin, en wi garra lafta dum samting blanga tharran.”