1 Wal Job bin kipgon tok, “Aibin meigim pramis nomo blanga lukinatbat langa ola yanggel. 2 God det brabli haibalawan oldei panishim eni men hu oldei dumbat detkain ting. 3 En God oldei jandim bigis trabul langa detlot pipul hu oldei dumbat nogudbala ting, 4 en im oldei wotjimbat mi blanga enijing ai dumbat.

5 “Mi nomo dalimbat eni laiya en ai nomo bin trikimbat pipul. 6 En ai oldei askim God blanga shoum olabat mi nomo giltiwan. 7 If aibin dum nogudbala ting langa im, o if aibin wandim dum lagijat, 8 wal enibodi gin dagat ola sid daga blanga main, en olabat gin rudimat ol main gadin.

9 “If aibin wandim blanga naja men waif en bin wandim gajim det gel, 10 wal larram det streinjawan men kaman en deigimwei main waif brom mi du. 11 If aibin deigimwei waif blanga najawan men, wal im brabli nogudwan tharran, 12 en tharran na garra meigim mi binijap, en ol main gadin garra ol barnbarn.

13 “Bifo, nomeda main wekinmenmob bin oldei grambul langa mi, bat stil aibin oldei gibitbat olabat feyago. 14 If ai nomo bin dum tharran, wal wanim ai garra dalim God wen im garra jadjim mi? 15 Dumaji God na det wanbala hubin gibit laif langa wi holot bifo wibin bon.”

16 Wal Job bin kipgon tok, “Ai nomo bin tridimbat widogel nogudbalawei, en detlot najalot pipul hubin jidan powan. 17 En aibin oldei gibit main daga langa ola biginini hu nomo garram eni dedi o mami. 18 Brom det taim na wen aibin brabli yangboi, aibin oldei kain langa eni biginini hubin jidan nomo garram dedi en mami en langa ola widogel du. 19 Aibin oldei faindim klos blanga ola powan pipul, 20 en olabat bin brabli gudbinji langa mi, dumaji aibin oldei gibitbat olabat womwan klos weya main wekingel olabat bin meigim brom wul brom main ronwan ship. 21 If ai bina trai blanga lidimap main bingga en yusum main pawa rongwei langa kothaus blanga ardimbat eni biginini hu nomo garram mami o dedi, 22 wal ai wandim det bingga garra buldan brom im pleis. 23 Ai nomo bin dum det nogudbala ting. Mi rili bradin dumaji God mait panishim mi.

24 “Ai nomo tok miselp ai garram bigismob mani en ebrijing en ai gin dum enijing ai wandim dum. 25 En ai nomo jidan praudbala dumaji aibin abum detmatj ebrijing. 26-27 En ai nomo weshipbat det san en mun opinwei o sigridbalawei. 28 If ai bina dum lagijat, wal God bina panishim langa mi.

29 “Ai nomo laf langa main enamimob wen olabat abum loda trabul. 30 En ai nomo dalim God blanga jandim nogudbala ting blanga meigim olabat dai. 31 Nomo enibodi jidan hanggribala langa main kemp. 32 Aibin oldei welkam eni trebalamob blanga kaman en stap langa main kemp. 33 Bigismob pipul oldei haidim olabat nogudbalawei brom najalot pipul, bat ai nomo dum lagijat. Najing. 34 Ai nomo sheim blanga dalimbat najalot pipul wanim aibin oldei dumbat.”

35 Wal Job bin kipgon tok, “Wotfo det boswan God nomo irrim en ensim mi? If aibin dum enijing rong, wal larram God shoum mi, en larram im raidimdan langa peipa. 36 En ai garra pudum tharran langa main klos en langa main hed weya ebribodi gin luk. 37 En ai garra lidimap main hed brabli haibala, en dalim im ebrijing wanim aibin dum.

38 “Ai nomo bin rabishim main kantri weya aibin growimap ola daga. 39 Ai nomo bin trikimbat main wekinmen olabat nogudbalawei en meigim olabat abum pein. If ai bina rabishim main kantri lagijat, wal det kantri bina kraikraibat. 40 If ai bina dum tharran, wal ai bina prei en askim im blanga jandim jigiwan gras langa main fam en nomo larram detlot sid daga blanga gro langa main fam.” Lagijat na Job bin tok, en imbin jidan kwaitbala na.